Pangur Bán

        Messe ocus Pangur bán
        cechtar nathar fria saindán:
        bíth a menmasam fri seilgg,
        mu menma céin im saincherdd.

        Caraimse fos, ferr cach clú,
        oc mu lebrán, léir ingnu;
        ní foirmtech frimm Pangur bán:
        caraid cesin a maccdán.

        Ó ru biam, scél cen scís,
        innar tegdais, ar n-oendís,
        táithiunn, díchríchide clius,
        ní fris tarddam ar n-áthius.

        Gnáth, húaraib, ar gressaib gal
        glenaid luch inna línsam;
        os mé, du-fuit im lín chéin
        dliged ndoraid cu ndronchéill.

        Fúachaidsem fri frega fál
        a rosc, a nglése comlán;
        fúachimm chéin fri frégi fis
        mu rosc réil, cesu imdis.

        Fáelidsem cu ndéne dul
        hi nglen luch inna gérchrub;
        hi tucu cheist ndoraid ndil
        os mé chene am fáelid.

        Cia beimmi a-min nach ré
        ní derban cách a chéle:
        maith la cechtar nár a dán;
        subaigthius a óenurán.

        Hé fesin as choimsid dáu
        in muid du-gní cach óenláu;
        du thabairt doraid du glé
        for mu mud céin am messe.

        (9ú haois; gan ainm)

Date: Mon, 11 Dec 1995 15:09:32 -0800
Sender: Gaelic Language Bulletin Board <GAELIC-L@IRLEARN.UCD.IE>
From: Dennis King <donncha@ESKIMO.COM>
Subject: Re: Pangur Bán

Seo é an dán ina iomláine, sa bhunteanga. B'fhéidir go bhfuil aistriúchán Nua-Ghaeilge ag duine eile amuigh ansin. Ní bheadh sé ródheacair Gaeilge an lae inniu a chur air.

Donncha


Aistriúcháin Bhéarla le:

2004-08-30 CPD