Fàilte don Chùrsa Adhartais

Leis a’ Chùrsa Adhartais, ruigidh oileanaich ìre de dh’ fhileantachd a tha a’ ciallachadh gu bheil e comasach dhaibh obair fhaighinn ann an saoghal na Gàidhlig. Tha an Cùrsa Adhartais a’ cleachdadh nan aon dòighean teagaisg is ionnsachaidh ris a’ Chùrsa Inntrigidh airson nam modalan cànain. Aig an aon àm, tha e a’ daingneachadh is a’ leudachadh nan sgilean cànain a fhuair oileanaich a chuir crìoch air a’ Chùrsa Inntrigidh. Tha an Cùrsa Adhartais a’ dèiligeadh ris na puingean cànain a tha am broinn a’ Chùrsa Chomais agus tha e aig Ìre 1 de Sgeama Ceuma ‘Gàidhlig is Cuspairean Co-cheangailte a thèid a thairgsinn aig Sabhal Mòr Ostaig.

Tha sia modalan cànain agus dà mhodal cuspaireil anns a’ Chùrsa Adhartais ’s iad air an teagasg tro mheadhan na Gàidhlig. Feumaidh na h-oileanaich obrachadh tro na modalan bho mhodal 1 gu modal 8. Bheir gach modal cànain ochd seachdainean agus bheir gach modal cuspaireil dà sheachdain dheug.

A' toirt luchd-ionnsachaidh nas fhaisge air a chèile

Aig amannan, faodaidh ionnsachadh air astar a bhith aonaranach. Air a' Chùrsa Adhartais bidh thu ag ionnsachadh mar phàirt de bhuidheann agus tha taic ri faotainn tron chùrsa gu lèir, le conaltradh air an fhòn agus le post-dealain. Tha bòrd-bràth ann far am faigh thu cothrom conaltradh a chumail le oileanaich eile. Leis na sgoiltean deireadh-seachdain roghainneil gheibh thu cothrom coinneachadh ro oileanaich eile ann an àrainneachd Ghàidhlig.

Gus faighinn air a’ Chùrsa ann an 2009-2010

Faodaidh tu tighinn air a’ Chùrsa Adhartais ma tha thu air crìoch shoirbheachail a chur air a’ Chùrsa Inntrigidh bho chionn ghoirid- ’s e sin ri ràdh ma tha thu air a’ Chùrsa Inntrigidh a choileanadh sa bhliadhna acadaimigeach 2008-09, faodaidh sibh tòiseachadh air a’ Chùrsa Adhartais sa bhliadhna acadaimigeach 2009-10.
Feumaidh na h-oileanaich a chuir crìoch air a’ Chùrsa Inntrigidh ro 2008-09 agallamh labhairteach a dhèanamh gus dearbhadh gu bheil iad aig an ìre riatanach gus tighinn air a’ chùrsa.
Air neo, faodaidh oileanaich tighinn air a’ chùrsa le aon teisteanas Àrd-ìre, neo na tha co-ionnan ris agus a bharrachd air sin feumaidh iad measadh sgrìobhte agus agallamh labhairteach a dhèanamh gus faighinn a-mach a bheil an t-ionnsachadh a rinn an tagraiche gu ruige seo co-ionnan san fharsaingeachd ris an ìre riatanach.

Dè an ìre aig am bi mi an dèidh crìoch a chur air a’ chùrsa?

Bidh e a’ toirt dà bhliadhna acadamaigeach gus an cùrsa seo a choileanadh. Tha seo a’ ciallachadh Modalan 1-5 sa chiad bhliadhna agus Modalan 6-8 san dàrna bliadhna.

Gheibh an fheadhainn a chuireas crìoch shoirbheachail air a’ Chùrsa Adhartas Teisteanas Foghlam Àrd-ìre bho OGE.

Gus faighinn a-steach gu modalan Ìre 2 de Sgeama na Gàidhlig agus Chuspairean Co-cheangailte air bhunait làn-thìde no pàirt-thìde, feumaidh oileanaich crìoch shoirbheachail a chur air measaidhean nam modalan air fad, stèidhichte air 40% air a’ char as lugha airson gach measaidh. A bharrachd air sin, feumaidh oileanaich cuibheas de 50% fhaighinn co-dhiù sna measaidhean airson Modalan 5 & 6.  Tha Sabhal Mòr Ostaig a’ leasachadh mhodalan aig Ìre 2 an-dràsta airson lìbhrigeadh mar fhoghlam air astar.

Airson an tuilleadh fiosrachaidh cuir fios gu:

Sgioba Chùrsaichean Air-loidhne
Sabhal Mòr Ostaig
Slèite
An t-Eilean Sgitheanach
IV44 8RQ

Fòn: +44 (0) 1471 888449/450
Facs: +44 (00 1471 888 009
Post-dealain

Cuideachd, thoiribh sùil air làrach-lìn Clì Gàidhlig, buidheann cothruim is adhartachaidh na Gàidhlig.