Seòrsaichean cùrsa a tha Sabhal Mòr Ostaig a' tabhainn

Cùrsaichean Làn-tìde

'S iad seo prìomh obair na Colaiste. Tha na cùrsaichean làn-tìde a' ruith bhon t-Sultainn dhan Ògmhìos. 'S ann tro mheadhan na Gàidhlig a tha an teagasg agus na deuchainnean gu lèir. 'S urrainn dhut cùrsa aon bhliadhna, dà bhliadhna, trì bliadhna (Ceum MA) no ceithir bliadhna (Ceum MA le Urram) a dhèanamh. Tha Dioploma ann an Telebhisean agus Ioma-Mheadhan Gàidhlig ga thabhann cuideachd.

Cùrsaichean Goirid

Cùrsaichean aon-sheachdainn dhan chuid as motha. 'S ann as t-samhradh nuair a bhios na h-oileanaich làn-tìde air falbh a tha a' chuid as motha dhiubh a' ruith, ach bidh feadhainn ann aig àm na Caisge agus àmanan eile den bhliadhna. A bharrachd air na cùrsaichean Gàidhlig, le ceithir diofar ìrean a' ruith còmhla mar as trice, tha cùrsaichean ann ann an ceòl, seinn, dannsa agus iomadh chuspair eile cuideachd. Mar as trice, 's ann tron Bheurla a tha iad gan teagasg, ach tha Gàidhlig aig cuid mhòr den luchd-teagaisg agus bidh iad toilichte Gàidhlig a bhruidhinn ribh.

Cùrsaichean air Astar

An Cùrsa Inntrigidh - 'S e cùrsa air astar le taic a th' anns a' Chùrsa Inntrigidh airson fìor luchd-tòiseachaidh sa Ghàidhlig. Tha an cùrsa a' cur barrachd cudroim air sgilean èisteachd agus labhairt na air sgilean sgrìobhaidh. 'S e amas a' Chùrsa brosnachadh a thoirt seachad a thaobh còmhradh a chumail sa Ghàidhlig.