---

Chuir Mícheál D Ó hUiginn fáilte an tseachtain seo roimh thuarascáil bhliantúil Údarás na Gaeltachta do 1995.
Bhí scéal maith sa tuarascáil nó léirigh sé gur chruthaigh an tÚdarás 1,250 post nua sa Ghaeltacht anuraidh.
Is ionann sin agus méadú de bhreis ar ocht go leith faoin chéad ar líon na bpost a bhí ann ag deireadh 1994.
Tá 6,835 post i dtionscal ar fud na Gaeltachta ag feidhmiú faoi scáth an Údaráis anois, an líon is mó riamh roimhe.
'Is ábhar mór sásaimh é go raibh glanmhéadú de bheagnach 540 post lánaimseartha sa Ghaeltacht anuraidh mar gheall ar iarrachtaí an Údaráis,' arsa an tAire Ó hUiginn, Aire Ealaíon, Cultúir, is Gaeltachta.
'Tá líon na ndaoine atá fostaithe faoi scáth Údarás na Gaeltachta níos airde anois ná riamh agus is comhartha maith é sin don bhliain seo, 1996.
'Tugann sé móruchtach dom.'
Agus lean sé,
'Ní mór dúinn cuimhneamh ar an toradh maith a baineadh amach i 1994.
'Don dara bliain as a chéile anois tá dul chun tosaigh mór déanta agus tá mé iontach dóchasach go mbeidh an scéal bisithe níos mó fiú faoi dheireadh 1996.
'Tugann an tuarascáil seo uchtach mór dom agus tréaslaím a n­obair le hÚdarás na Gaeltachta.'
Ní lú an sonas a bhí ar an Údarás féin ar ndóigh.
Dúirt Seán Ó Neachtáin, cathaoirleach an Údaráis gur ábhar misnigh na figiúirí agus go bhfuil dóchas aige gur féidir dlús a chur faoin fhás seo.
Bhí dea­scéal ag an Uas Ó Neachtain fosta dóibh sin atá ag brú turasóireachta sa Ghaeltacht.
Bíodh is go bhfuil baint i gcónaí ag an Údarás le cúrsaí turasóireachta ansin beidh siad ag cur béim níos mó amach anseo ar chuidiú a sholáthar do ghnó na turasóireachta sa Ghaeltacht agus go háirithe turasóireacht chultúrtha.
Dúirt an tUas Ó Neachtáin go bhfuil sé iontach muiníneach go rachaidh an casadh úr seo go mór chun leas phobal na Gaeltachta.

D'oscail Ambasáid Iosrael sa tír seo don chéad uair riamh Dé Domhnaigh seo caite.
Thug an tAmbasadóir nua, Zvi Gabay 'lá stairiúil' ar an ócáid agus thuar go dtiocfadh biseach ar an chaidreamh idir an dá thír.
Bhí Éire ar an tír dheireanach san Aontas Eorpach chun ligean d'Iosrael Ambasáid a oscailt ann agus tugann an oscailt chun deiridh an seal fada naimhdis idir an dá thír.
Cuireadh caidreamh taidhleoireachta idir Iosrael agus Éire ar bun 21 bhliain ó shin ach go dtí an tseachtain seo b'éigean feidhmiú trí Ambasáid Iosrael i Londain.
Dhiúltaigh an Rialtas roinnt uaireanta d'iarrachtaí Iosrael chun Ambasáid a oscailt in Éirinn, comhartha den déistin a chuir gníomhartha thrúpaí Iosrael i ndeisceart na Liobáine ar Rialtas na hÉireann.
Maraíodh go leor trúpaí de chuid na hÉireann ar dualgas leis na Náisiúin Aontaithe in ionsaithe a rinne trúpaí Iosrael, is trúpaí dúchasacha faoi scath Iosrael, ar na hÉireannaigh.
Bhí an chuma ar an scéal nach gceadódh an Rialtas Ambasáid Iosraelach go deo ach i 1993 nuair a thosaigh an próiseas síochána idir Iosrael agus Eagras Fhuascailt na bPalaistíneach cheadaigh an Rialtas ambasáid Iosraelach.
Ar an lá céanna d'fhógair siad go raibh siad ag ceadú d'Eagras Fhuascailt na bPalaistíneach oifig a oscailt i mBaile Átha Cliath.
Níl aon Ambasáid Éireannach in Iosrael.
Ní hiad cúrsaí na polaitíochta amháin a chur isteach ar seo ach le cois ní raibh an t­airgead ag an Roinn Gnóthaí Eachtracha chun ambasáid a oscailt ansin.
Má shocraítear a leithéid a oscailt feasta, agus má bhíonn fás ar trádáil idir an dá thír is dócha go socrófar ar sin a dhéanamh, beidh an Ambasáid nua i dTel Aviv.
Tá Meiriceá chun ambasáid s'acu a bhogadh ó Tel Aviv go hIarúsailéim mar gheall ar fhonn na nIosraelach a chur in iúl gurb é Iarúsailéim a 'bpríomhchathair shíoraí.'
Ach deir foinsí sa Roinn Gnóthaí Eachtracha go mbeidh aon ambasáid Éireannach in Iosrael i dTel Aviv.
Ina measc sin a bhí páirteach i gceiliúradh an Domhnaigh seo caite bhí Ardmhéara Bhaile Átha Cliath, Seán, 'Cuan Bhaile Átha Cliath,' Loftus, agus baill den phobal Giúdach in Éirinn.

Níl ríomhphost ar fáil