---

Churchill Náid - Cú Chulainn a hAon

Gaeilgeoirí sa Lóiste Úr i mBéal Feirste.
Le tamall anuas bhí muintir na háite i gceantar náisiúnaíoch amháin, an Lóiste Úr, ag iarraidh a mbloic árasán a athainmniú.
Chuir sé isteach orthu go raibh na naoi mbloc ainmnithe as ceannairí míleata is cathanna de chuid Shasana, leithéidí Churchill, Alemein, Templar.
Mar sin reáchtáil siad feachtas chun na bloic a athainmniú, feachtas a raibh toradh air an tseachtain seo caite nuair a d'imigh ainm Churchill agus glacadh leis an ainm Cú Chulainn, cuireadh deireadh le Victoria agus cuireadh Gráinne ina háit agus mar sin.

Conradh na gCon

Bord na Gaeilge.
Más fíor d'éan beag tá an Bord tar éis diúltú d'iarratas ó Chonradh na Gaeilge do chabhair airgid le seachtain na Gaeilge a reáchtáil.
Tá próifíl ard ag an Bhord ar ndóigh agus cuid den straitéis phoiblíochta ná fógraíocht a cheannach ag cluichí sacair, ag rásaí capall, corn a urrú ag rásaí con, agus urraíocht a dhéanamh ag cluiche ceannais na camógaíochta.
Níl fadhb dá laghad ag Scéaltacht le ceann ar bith acu sin nó tá an pobal mór níos eolaí faoi Bhord na Gaeilge ná faoi aon eagras eile a chuireann an teanga chun cinn.
Ach cad é atá cearr le hurraíocht a dhéanamh ar cheann de na príomhimeachtaí Gaeilge sa bhliain, Seachtain na Gaeilge?

Beart de réir briathair

Gael-Linn.
Tamall beag ó shin dúirt an colúnaí ar an Irish Times go raibh an cúrsa foghlama Gaeilge de chuid Gael-Linn a rinne sé ar an sladmhargadh ab fhearr dá bhfuair sé riamh.
Agus an mhaidin dár gcionn d'oscail Scéaltacht litir ó Ghael - Linn ag fógairt comórtas Gaeilge d'ollscoileanna dár teideal Caidreamh '96.
Preasráiteas iomlán - as Béarla!
Ní seo an chéad uair ar ndóigh a chuir eagrais nó institiúidí Gaeilge preasráiteas as Béarla go LÁ.
Agus cuirfear an ceann seo san áit céanna ar cuireadh na cinn eile - sa channa bruscair.

Fáinne Uí Chadháin

Máirtín Ó Cadhain
Agus an Conradh ag caint faoi Fháinne Úr a chur ar fáil ó mhí Feabhra ar aghaidh cuimhníonn duine dár leitheoirí dúinn gur chaith Máirtín Ó Cadháin tamall fostaithe mar thimire ag an Chonradh agus é de dhualgas air an Fháinne a bhrú.
Ach ní ar dhíol an Fháinne is mó a bhí aird Mháirtín.
Deirtear gur mó a d'ardaigh ballraíocht an IRA ná lucht an Fháinne sna ceantair ar thug Máirtín Ó Cadhain cuairt orthu.

Cluas le talamh

Alan Murray, iaririseoir leis an Irish Press agus atá anois ina iriseoir neamhspléach i mBéal Feirste.
Tá clú ar Murray as a dhlúth-theagmhálacha leis na dílseoirí paramhíleata agus le hoifigigh Rialtas Shasana.
Ar chlár cúrsaí reatha ar UTV, Dé Luain seo caite, thuar an tUas Murray go bhfógródh John Major toghchán do Thionól sa House of Commons Dé Céadaoin.
Is aige a bhí an ceart, a bhuí dá theagmhálacha le hoifigigh Rialtais de réir dealraimh.
Is trua nach bhfuil teagmhálacha Rialtas na hÉireann chomh maith céanna.

Smidiríní

An tAiléar Draíochta
Cé atá breá sona? Séamas Mac Annaidh, úrscéalaí Gaeilge as Fear Manach mar aon le craoltóir raidió, ceoltóir is fear léinn.
Tá Séamas tar éis tithe maorga na nOllscoileanna a thréigean chun clár teilifíse do pháistí na Sé Chontae a chur i láthair ar maidin ar BBC 2.
Is as Gaeilge a bhíonn an clár amanna agus as Béarla amanna eile.
An t-Ailéar Draíochta is ainm don chlár - agus tá sé thar barr.

Seán Buí
Cé hé Príomhaire na Breataine? Más fíor do Leni Fischer, Uachtarán Chomhairle na hEorpa, is é John Bruton Príomhaire na Breataine.
Sin mar a chuir sí síos ar an Taoiseach nuair a labhair sé ag an Chomhairle an tseachtain seo caite.
Téann clú duine roimhe.

Ná déan dearmad
Cé nach ndéanfaidh dearmad? Bill Clinton a bhfuil seomra sa Teach Bán maisithe aige le cuimhní a chuairte ar Éirinn anuraidh.
Tuigtear go bhfuil an tUachtarán ag brath bheith páirteach i bParáid na Féile Pádraig i Chicago, an chéad Uachtarán le bheith páirteach i bparáid na Féile Pádraig le fada an lá.

Focal le Gaoth

'Go dtí seo tá teipthe uirthi go tubaisteach'
P J Stone, Ardrúnaí Cúnta Chumann Ionadaíochta an Gharda Síochána agus é ag caint ar an Aire Dlí agus Cirt, Nóra Owen

'Cuireadh an scéal seo as a riocht ar fad'
An Dr Micheal Herity, saineolaí ag Coláiste na hOllscoile Baile Átha Cliath, ag caint faoi thuairisc go bhfuil iarsmaí aimsithe a thugann le fios gur tháinig na Rómanaigh go hÉirinn

'Tá a thacaíocht sa chine dubh i Meiriceá míle leathan. Ach níl sé orlach domhan.'
Ceannaire pobail den chine dubh ag caint faoi dhearcadh Meiriceánach dubh ar OJ Simpson

'Níl an ród seo gan dainséar ach is iontach an toradh a bheidh ann ag ceann scríbe'
Tuarascáil Mhistéil ar dhíchoimisiniú arm ag moladh do na páirtithe uile glacadh lena moltaí

'Dhumpáil John Major an próiseas débhealach. Is léir go bhfuil sé ag iarraidh réamhchoinníoll nua a chur chun tosaigh de thairbhe gur scor Mitchell den chéad réamhchoinníoll s'aige Tá John Major ag tacú le clár oibre Aontachtach'
Gearóid Mac Adaim, ceannaire Shinn Féin

'Tá mise ag cloí leis an mhéid a d'aontaigh an dá Rialtas i mí na Samhna anuraidh, is é sin go bhfuil sé mar rún againn cainteanna ilpháirtí a chur sa siúl faoi dheireadh mhí Feabhra'
John Bruton ag cur in iúl nach Tionól ach cainteanna ilpháirtí príomhchuspóir a Rialtais

'Seo bunchloch dár stát Palaistíneach'
Yasser Arafat ag caint faoina bhua sa toghchn Palaistíneach

'Tá taise agam do Fred Goldman cionn is gur chaill sé mac nuair a dhúnmharaigh duine eigin an mac sin. Ach tá mé feargach leis fosta nó dúirt sé féin is clann Brown rudaí fúm atá gan bunús ar fad'
O J Simpson, ina chéad agallamh teilifíse ó fuarthas neamhchiontach é as marú Nicole Brown agus Ronnie Goldman

---

Níl ríomhphost ar fáil