Eagarfhocal

Ag dul sa seans ar son na síochána

Go dtí seachtain ó shin bhí an dá Rialtas ag obair ar straitéis chomhaontaithe le próiseas na síochána a bhrú chun tosaigh.
Ba é a gcuspóir ná cainteanna ilpháirtí a chur sa siúl roimh dheireadh mhí Feabhra.
Leis an aidhm sin a bhaint amach bhí roinnt rudaí de dhíth.
Ó thaobh na Náisiúnaithe de bheadh orthu géilleadh beagán ar roinnt ceisteanna.
Sa chéad dul síos bheadh ar an IRA bogadh éigin a dhéanamh i dtreo díchoimisinithe.
Bunaíodh Coimisiún Mitchell le go dtiocfadh le sin titim amach.
Leag Mitchell síos plean a thabharfadh ar an IRA bogadh éigin a dhéanamh ar cheist na n-arm agus ar cheisteanna eile.
Níor dhiúltaigh an IRA nó Sinn Féin dó. Ina áit sin thug Gearóid Mac Adaim leid go bhféachfaidís leis na Sé Phrionsabal a dhréachtaigh Mitchell a chur i bhfeidhm.
Rud eile a bhí riachtanach ó Náisiúnaithe le go n-oibreodh an chuid seo den phróiseas ná go dtabharfadh siad aird ar mhian na nAontachtaithe go mbeadh tionól ann.
Thug na Náisiúnaithe de gach aicme aird ar an phointe sin fosta.
Chuir Rialtas na hÉireann in iúl go mbeadh siad sásta a leithéid a phlé, thug an SDLP le fios go mbeadh fiúntas i dTionól ach tar éis do chainteanna ilpháirtí bheith curtha sa siúl.
Tugadh ar Shinn Féin bogadh fosta agus dúirt Mitchell Mc Laughlin go mbeadh siad sásta machnamh faoi thionól fad is go raibh sé soiléir go mbeadh ról teoranta aige agus fad is go raibh cainteanna ilpháirtí sa siúl.
Ghéill na Náisiúnaithe cuid mhaith chun a chinntiú nach dteipfeadh ar an chuid seo den phróiseas.
Chuaigh siad sa seans ar son na síochána.
Go díreach mar atá ról ag Rialtas na hÉireann na páirtithe Náisiúnaíocha a mhealladh is a bhrú chun bogadh óna seasamh fadbhunaithe, tá dualgas ar Rialtas Shasana na páirtithe Aontachtacha a bhrú is a mhealladh óna seasamh fadbhunaithe.
In áit bheith ag comhlíonadh an dualgais sin thacaigh Rialtas Shasana céad faoin chéad le hiarrachtaí na nAontachtaithe chun fanacht reoite sa stair, chun tionól nua a chur ar bun ag Stormont.
Ní amháin go ndearna John Major feall sa dualgas a bhí air sa chuid seo den phróiseas ach le cois, rinne sé é ar shlí a thaispeáin gur cuma leis sa sioc cad a shíleann Rialtas na hÉireann nó Náisiúnaithe na hÉireann.
Ní raibh sé de mhúineadh ann fiú a chur in iúl do Rialtas na hÉireann roimh ré go raibh sé ag dul a chliseadh ar an ghealltanas a thug sé dóibh.
An aon ionadh go raibh lúcháir thar na bearta ar bhinsí na nAontachtaithe ag Westminster Déardaoin seo caite?
An aon ionadh é go raibh ísealphointe ann sa chaidreamh idir an dá Rialtas?
Is é an t-aon toradh a thiocfaidh as feall John Major an tseachtain seo caite ná cur leis an leamhsháinn i bpróiseas na síochána.
Ní éireoidh le Tionól sa ghearrthréimhse mar ní oibreoidh sé gan tacaíocht iomlán na Náisiúnaithe.
Thug George Mitchell an méid sin le fios sa tuarascáil a dhréachtaigh sé.
Ní bheidh ról tábhachtach ag Tionól sa chuid seo de phróiseas na síochána is cuma cad é an brú a chuirfidh John Major is na hAontachtaithe.
Ní féidir le Tionól an próiseas a bhogadh chun tosaigh sa ghearrthréimhse.
Níl ach aon rogha amháin ann chun an próiseas a chur chun cinn ag an am seo.
Is é sin cainteanna ilpháirtí.
Níor chuir ceachtar den dá Rialtas aon rogha bheochumasach ar sin chun tosaigh.
An dualgas atá anois ar John Major ná a dhéanamh le hAontachtaithe an rud céanna is a rinne Rialtas na hÉireann le Náisiúnaithe.
Ciallaíonn sé sin go gcaithfidh John Major úsáid a bhaint as gach modh atá ar fáil aige, na meáin, a chóras caidreamh poiblí, brú polaitiúil, cairde sa chúirt agus cibé bealach eile atá réasúnta chun na hAontachtaithe a mhealladh nó a bhrú óna seasamh fadbhunaithe.
Beidh air dul sa seans le haghaidh na síochána.
Beidh air bheith cúramach is stuama ach níl an dara rogha aige.
Nó mura mbogfaidh Aontachtaithe, mura gcloífidh John Major leis an ghealltanas a thug a Rialtas chun cainteanna ilpháirtí a chur sa siúl roimh dheireadh mhí Feabhra, beidh sé ag cruthú do chách nach bhfuil Rialtas Shasana ag brath próiseas na síochána a fheidhmiú a thuilleadh.
Agus chuirfeadh sin an próiseas ar fad i mbaol. Tá an próiseas ag dul a oibriú cionn is go gcomhlíonann an dá Rialtas a gcuid dualgais nó tá sé ag dul a thitim de thairbhe go loiceann Rialtas amháin nó an dá Rialtas ar a ndualgais.
Tá sé in am ag John Major rogha a dhéanamh.

Stáisiúin Garda faoin tuath

Is é an toradh is measa ar an choiriúlacht atá ag titim amach in Iarthar na hÉireann faoi láthair ná go bhfuil sé ag creimeadh ar an mhuinín atá ag an ghnáthphobal as an Gharda.
Ní hiad an Garda atá freagrach as laigí an pholasaí frithchoiriúlachta ach an Rialtas.
Caithfidh an Rialtas athmhachnamh a dhéanamh faoi chúrsaí póilíneachta i gcoitinne.
Ní mór dóibh cinneadh ar cheart cur le líon na nGarda nó nár cheart.
Ní mór dóibh breathnú arís, anois go bhfuil na trioblóidí thart, ar athlonnú Gardaí atá fós lonnaithe cois teorann.
Ba náireach an tslí nár leanadh le Príosún an Chaisleáin Riabhaigh ainneoin tacaíocht an Aire Dlí is Cirt, agus ní mór don Rialtas athmhachnamh ar sin.
Is éigean don Rialtas breathnú arís ar an pholasaí de bheith ag druidim stáisiúin Gharda tuaithe nó gan amhras ar bith is é an t-arm is láidre in aghaidh na gcoirpeach ná an dlúthchaidreamh idir an Garda agus pobal na tuaithe.
Ceist eile is gá a scrúdú ná rialacha an Roinn Leasa Shóisialaigh maidir le pinsín do sheandaoine.
Is de thairbhe go bhfuil siad buartha go gcaillfidh siad an pinsean a choinníonn seandaoine airgead faoi cheilt ina dtithe féin seachas é a chur i dtaisce sa bhanc.
Táimid beo in am a mbeidh méid áirithe coiriúlachta ann i gcónaí.
Is amhlaidh is tábhachtaí mar sin go dtabharfar na háiseanna don Gharda ní amháin le gníomhú in aghaidh coirpeach ach go lonnófar Gardaí i measc an phobal tuaithe le go leanfaidh siad leis an dlúthchaidreamh atá acu leo.
Is é an caidreamh sin an tslí is éifeachtaí.

[CLÁR][1] [2] [3] [4] [5] [6] [7] [8] [9] [10]
[11] [12] [13] [14] [15] [16] [17] [18] [19] [20]

Níl ríomhphost ar fáil