Toscaire síochána

le hEoghan Ó Néill
Tá cath taidhleoireachta fíochmhar ar siúl i Stáit Aontaithe Mheiriceá an tseachtain seo de réir mar a fhéachann Náisiúnaithe is a dtacaithe thall tabhairt ar Bill Clinton toscaire síochána a cheapadh do na Sé Chontae.
Tá an tUachtarán Clinton ag meabhrú faoi thairiscint ó George Mitchell chun 'cuidiú ar cibé slí is féidir liom le cúis na síochána in Éirinn.'
Bhain Gearóid Mac Adaim Meiriceá amach inné, Dé Céadaoin, agus beidh cruinniú aige ag an Teach Bán ar an tseachtain seo chugainn.
Tá Niall O'Dowd agus Bruce Morrison, beirt de na Gaeil Mheiriceá a raibh ról lárnach acu i bhfógairt sos cogaidh an IRA, tá siad beirt ag iarraidh ar an Uachtarán Clinton toscaire síochána a cheapadh chun an leamhsháinn i bpróiseas na síochána a chealú.
Mhaígh Bruce Morrison, Teachta Comhdhála, go bhfuil cúrsaí go dona agus go gcaithfidh an tUachtarán Clinton teacht i dtarrtháil ar an phróiseas.
Bhuail George Mitchell leis an Uachtarán Clinton Dé Luain agus chuir sé ar an eolas é faoina thuarascáil.
Thairg sé leanúint ar aghaidh ag obair ar son na síochána in Éirinn dá mba mhian leis an Uachtarán go ndéanfadh sé sin.
Tuigtear go raibh teagmhálacha rialta an tseachtain seo idir oifigigh Rialtas na hÉireann agus Tony Lake, comhairleoir slándála Bill Clinton.
Chuir Rialtas na hÉireann a n-imní faoi sheasamh Rialtas Shasana in iúl don Teach Bán.
Sa bhaile tá sraith de chruinnithe beartaithe ar gach taobh de réir mar a dhéantar iarracht an dochar a rinne ráiteas John Major i Westminter seachtain ó shin a chóiriú.
Buailfidh Patrick Mayhew le Dick Spring inniu, Déardaoin, agus bhí roinnt cruinnithe idir oifigigh an dá thaobh cheana féin an tseachtain seo.
Beidh cruinniú níos déanaí an tseachtain seo idir an SDLP is John Major agus idir Sinn Féin is Patrick Mayhew.
Tá Rialtas na hÉireann ag iarraidh bualadh le David Trimble chun a phlean do thionól a phlé.
Agus bhí cruinniú níos túisce an tseachtain seo idir an PUP, páirtí na ndílseoirí paramhíleata, agus an SDLP.
Dúirt John Hume go raibh an cruinniú iontach dearfach is bisiúil agus go bhfuil go leor talamh comónta ag an dá pháirtí.
Bhí Gusty Spence, iarcheannaire an UVF, ar thoscaireacht an PUP.
Tá an dá pháirtí atá cóngarach do na dilseoirí paramhíleata, an PUP is an UPP, iontach buartha faoi phlean Rialtas Shasana chun tionól a bhunú níos déanaí i mbliana.
Tá siad buartha nach bhfaighidh siad vóta mór agus nach mbeidh ionadaíocht acu sa Tionól úd.
Tá curtha in iúl go minic ag leithéidí David Ervine nach féidir síocháin a bhaint amach gan na páirtithe dílseora paramhíleatach bheith páirteach ann.

Togha bliain don Údarás

Bhí a bliain ab fhearr riamh ag Údarás na Gaeltachta i 1995 thug Ruán Ó Bric le fios Dé Luain nuair a rinne sé tuarascáil bliantúil an Údaráis a fhoilsiú ag ócáid in Eastát Tionsclaíoch Ghaoth Dobhair.
Cruthaíodh 1,250 post úr sa Ghaeltacht i 1995 ainneoin iomaíocht mhór idirnáisiúnta, rud a hiallaíonn go bhfuil 6,835 duine fostaithe anois faoi scáth an Údaráis.
Ach tá drochstaid na mbóithre sna ceantair Ghaeltachta ag cosc ar an Údarás níos mó jabanna fós a mhealladh, tugadh le fios.
Agus cailleadh suas le 700 post sa Ghaeltacht mar gheall ar iomaíocht ó Oirthear na hEorpa, áit a bhfuil earraí á dtáirgeadh ar phraghas i bhfad níos ísle ná mar isr féidir iad a tháirgeadh in Éirinn.
A ainneoin sin áfach, bhí togha bliain ag an Údarás, thug an tUas Ó Bric le fios agus d'fhógair sé go bhfuil cead faighte ag an Údarás anois chun béim níos mó a chur feasta ar thurasóireacht, is go háirithe ar thurasóireacht chultúrtha sa Ghaeltacht.

Peannchairde

Tá cimí Poblachtacha sa Jailtacht, an sciathan Gaeilge i bpríosún na Ceise Fada, ag iarraidh ar chailíní/mhná a bhfuil Gaeilge acu agus ar spéis leo scríobh chucu, dul i dteagmháil leo.
Is féidir freagraí a sheoladh go dtí Bosca 34, LÁ, 216 Bóthar na bhFál, Béal Feirste, BT12 6AH.

[CLÁR] [1] [2] [3] [4] [5] [6] [7] [8] [9] [10]

[11] [12] [13] [14] [15] [16] [17] [18] [19] [20]

Níl ríomhphost ar fáil