Chan "comma" í i gcainnt Thír Chonaill — nó cailín a imreas camógaidheacht ach oiread! Ach tá dhá úsáid leis an fhocal ag na scríobhnóirí Conallacha.

1. camóg araidhe: ball ar gach taoibh den éadan, temple

Seosamh 'ac Grianna: Seideán Bruithne / Amy Foster, lch 87, líne 4
Chuach sé é féin isteach i gcoirneál ina ghucaide, agus a dhá dhorn ar a dhá chamóig araidhe.

Seosamh 'ac Grianna: Ben-Hur, lch 85, líne 17
Bhí an dá chamóig araidh agus lag ionntu; bhí an t-éadan mar bhéadh carraig ruicneach ann.

Seaghán 'ac Meanman: Mám Eile as an Mhála Chéadna, lch 83, líne 4
Bhí ruicne beaga ar chlár a h-éadain a's bhí léithe bheag ar a camóig araidh.

2. ar chliabh, áit a bhfaghtar greim air. Is cosmhail, ón mhíniú a bheir FGB uirthi — chink — gur poll nó beárna eadar na slatacha í.

Séamus 'ac Grianna: Rann na Feirste, lch 98, líne 5
Ní rabh camógaí ar bith aige ann, cá bith mar thógfaidhe ar dhuine é, nuair a bhéadh a lán mónadh nó preátaí nó leathaighe nó feamnaighe ann.

Pádraig Ó Gallchobhair: Cáitheamh na dTonn, lch 19, líne 29
Líon sé cliabh de'n fheamnaigh, bheir sé air fá na camógaí, thóg ar chloich bhí in aice leis é, agus chuir ar a ghualainn é.