Rugadh William Morgan ann an Ty Mawr, Penmachno, taigh a tha an-diugh ann an seibh an Urrais Nàiseanta, agus mar sin, fosgailte dhan mhòr-shluagh. Nuair a  bha e na bhalach, fhuair e foghlam ann an taigh Sir John Wynn ann an Gwydir, mus deach e dhan oilthigh ann an Cambridge, nuair a bha e mu fhichead bliadhna a dh'aois. Fhad's a bha e anns an oilthigh, eadar 1565-71, dh' ionnsaich e  Eabhra, cuspair a bha gu math feumail nuair a thòisich e air an obair eadar-theangachaidh. Tha am Bìoball Eabhrach aige air maireachdainn gus an latha an-diugh, leis na notaichean anns an làmhsgrìobhadh aige fhèin aig oir nan duilleag.

Nuair a dh'fhalbh e Cambridge, bha esan na bhiocair, an toiseach ann an Llanbadarn Fawr, faisg air Aberystwyth agus an uair sin ann an Trallwng. Ràinig e Llanrhaedr ym Mochant ann an Siorrachd Dinbych ann an 1578, agus 's ann an seo a thòisich e air an obair a thug cliù dha.

Nuair a bha am Bìoball deiseil ann an 1587, chaidh Willaim Morgan fhèin gu Lunnainn, agus 's ann an seo a dh'fhuirich e airson bliadhna gu lèir, fhad 's a bha na foillsichearan ga chlò-bhualadh air sgàth 's nach robh facal Cuimris aca. Thàinig am Bìoball a-mach ann an 1588, 's e air a mholadh airson na Cuimris soilleir a bh' ann, rud nach robh aig Salesbury anns an Tiomnadh Nuadh aige a thàinig a-mach ann an 1567.

Sgrìobh Ieuan Tew à Cydweli rann a bha a' cur failte air a' Bhìoball ùr aig Willaim Morgan, 's esan ag ràdh gu bheil am Bìoball Cuimris mar a' ghrian a' toirt solais dhuinn.