Co-chomhairleachadh air Seanadh SMO

Tha Sabhal Mòr Ostaig a’ moladh gun tèid buidheann ùr, air a bheil an Seanadh, a stèidheachadh airson cùisean acadaimigeach a riaghladh ann an dòigh nas èifeachdaich. Thèid cumhachdan nan comataidhean acadaimigeach is rannsachaidh an-dràsta a chur fo chumhachdan an t-Seanaidh. Bidh an Seanadh a’ freagairt ris a’ Bhòrd Stiùiridh.

’S e àrd-bhuidheann acadaimigeach aig Institiud Foghlam Àrd-ìre no Oilthigh a th’ ann an Seanadh. Tha e an urra ris na gnìomhan acadaimigeach a leithid teagasg agus rannsachadh. Tha an Seanadh, mar as trice, an urra ri cùram oileanach cuideachd.

Coileanaidh sinn na h-ìrean foghlaim is ionnsachaidh dian againn fhèin tro chruthachadh an t-Seanaidh. Bidh an Seanadh a’ dearbhadh gun daingnich sinn riaghailtean cùram oileanach.

Feumaidh sinn structar riaghlaidh ùr a chur an sàs a tha a’ freagairt air na dleastanasan againn, as urrainn cumhaichean na h-inbhe sin a làimhseachadh agus a ghèilleas ri riaghailtean laghail Riaghaltas na h-Alba a thaobh Institiudan Foghlam Àrd-ìre agus e mar dùil againn a bhith nar Institiud Foghlam Àrd-ìre is sinn ag obair a dh’ionnsaigh inbhe Institiud Bheag Shònraichte.

Bidh an Seanadh an urra ri dealbhadh, co-òrdanachadh, leasachadh is stiùireadh nam poileasaidhean is nam modhan-obrach an lùib gnìomhan acadaimigeach na Colaiste a leithid aontachadh chùrsaichean ùra, phròiseactan rannsachaidh agus iomairtean cùram oileanach.

Bidh na comataidhean a leanas ag obair fon t-Seanadh:

1. Comataidh Rannsachaidh, cuide ri Fo-chomataidh Eitic
2. Comataidh Sgoilearachdan
3. Comataidh Deagh-ghnè
4. Comataidh Chomhairleachaidh Leabharlainn
5. Buidheann Cùraim

Thathar a’ moladh gum bi deichnear bhall air an t-Seanadh, agus nam measg bidh ceathrar riochdairean àrd ìre na Colaiste, ceathrar riochdairean luchd-obrach an Fhoghlaim agus dithis riochdairean oileanach. Thèid riochdairean luchd-obrach an Fhoghlaim is na riochdairean oileanach a thaghadh don t-Seanadh. Thathar a’ moladh gum mair teirmean nan riochdairean acadaimigich trì bliadhna agus gum faodar an taghadh a-rithist. Thathar a’ moladh gum mair teirmean oileanaich aon bhliadhna a-mhàin agus gum faodar an taghadh a-rithist.

Tha meud an t-Seanaidh a rèir meud an t-Sabhail Mhòir agus a’ rèir Achd Foghlam Àrd-Ìre (Alba) is lagh chompanaidhean.      

Luchd-acadaimigeach: thathar a’ moladh gum faod luchd-obrach acadaimigeach air cùmhnantan leantainneach, làn-ùine no pàirt-ùine, air an àrainn no air astar, a bhith nan tagraiche.

Oileanaich: Thathar a’ moladh gum faod gach oileanach, eadar foghlam leantainneach (An Cùrsa Inntrigidh, Preantasachdan Bun-ìre), cùrsaichean fo-cheum is iar-cheum, air an làraich no air astar, a bhith nan tagraiche; (ach chan fhaod oileanaich air cùrsaichean goirid).

Thathar a’ moladh gum faod luchd-obrach acadaimigeach air cùmhnantan leantainneach, làn-ùine no pàirt-ùine, air an àrainn no air astar, a bhith a’ bhòtadh.

Thathar a’ moladh gum faod gach oileanach, eadar foghlam leantainneach (An Cùrsa Inntrigidh, Preantasachdan Bun-ìre), cùrsaichean fo-cheum is iar-cheum, air an làraich no air astar, bhòtadh airson tagraiche; (ach chan fhaod oileanaich air cùrsaichean goirid).

Coinnichidh an Seanadh trì tursan sa bhliadhna aig a’ char as lugha.

Bidh Bòrd Shabhal Mòr Ostaig a’ cur nan cumhachdan airson co-dhùnaidhean ro-innleachdail a dhèanamh air cùrsaichean, prògraman, leasachadh a’ chlàir-oide is eile fo chùram an t-Seanaidh: bidh cothrom aig luchd-obrach an Fhoghlaim is oileanaich làmh a bhith aig an stiùir a thaobh chùisean acadaimigeach. Bidh an Seanadh a’ taghadh dithis riochdairean air a’ Bhòrd. Cuiridh riochdairean ris na co-dhùnaidhean às leth an t-Seanaidh.

Bidh ceanglaichean làidir eadar am Bòrd agus an Seanadh, agus obraichidh iad gu dlùth gus taic a chumail ri ar gluasad gu HEI agus dèanamh cinnteach gun dèan sinn ar dìcheall gus na h-ìrean acadaimigeach, rannsachaidh agus cùraim as àirde a choileanadh anns gach rud a nì sinn.

Bidh e na dhleastanas air a’ Bhòrd dèanamh cinnteach gu bheil an Seanadh air a stèidheachadh gu ceart agus a rèir riaghailtean laghail Riaghaltas na h-Alba a thaobh Institiudan Foghlam Àrd-ìre. Bidh an Seanadh ag obair a rèir a’ chomais aige agus a’ dèanamh cho-dhùnaidhean acadaimigeach mar a bhios iomchaidh no a’ toirt comhairle don Bhòrd mu cho-dhùnaidhean a dh’fheumas am Bòrd a dhèanamh.

Bidh an Seanadh cuideachd air a riochdachadh air a’ Bhòrd le dithis bhall, a’ toirt cothrom dhaibh – às leth an t-Seanaidh – cur ris a’ phròiseas co-dhùnaidh nas fharsainge.

Thèid aithisg Seanaidh a chur a-steach gu gach coinneamh Bùird gus fiosrachadh às ùr a thoirt seachad a bharrachd air co-dhùnaidhean no stiùireadh a shireadh.

Ma tha thu nad acadaimigeach air cùmhnant leantainneach b’ urrainn dhut tagradh a chur air adhart airson taghaidhean an t-Seanaidh. Thèid na taghaidhean a chumail gach bliadhna, san Dàmhair mar as bitheanta. Faodaidh luchd-obrach draghan no cùisean a thogail le riochdairean luchd-obrach air cùisean acadaimigeach no cùram oileanach tron bhliadhna.

Thèid riochdairean luchd-obrach acadaimigeach a thaghadh le luchd-obrach acadaimigeach agus bidh iad a’ riochdachadh luchd-obrach acadaimigeach gu lèir. Thèid riochdairean oileanach a thaghadh leis na h-oileanaich is bidh iadsan a’ riochdadh nan oileanach gu lèir. Bidh na riochdairean oileanach nam buill (ex officio) den Chomataidh Chomhairleachaidh Oileanach a bhios a’ coinneachadh gach teirm. Leigidh seo le riochdairean oileanach an t-Seanaidh com-pàirteachadh leis na h-oileanaich is luchd-obrach an Fhoghlaim agus eòlas a chur air cùisean a tha a’ toirt buaidh air diofar bhuidhnean de dh’oileanaich. Feumaidh gach ball den t-Seanadh dèanamh cinnteach gu bheilear a’ coileanadh raon-obrach an t-Seanaidh agus gu bheilear a’ cumail ris na h-ìrean foghlaim, rannsachaidh is cùram oileanaich as àirde.

Tha laghan is riaghailtean soilleir ann airson cruthachadh seanadh a stiùireadh agus feumaidh sinn dèanamh cinnteach gu bheil an structar riaghlaidh ùr a’ cumail riutha. Chuir na laghan seo ri gach ìre den phròiseas. Chaidh mòran rannsachadh cuideachd a dhèanamh air Seanaidhean eile, gu sònraichte air na Seanaidhean aig Sgoil Ealain Ghlaschu agus Conservatoire Rìoghail na h-Alba. B’ e pròiseas feumail a bha seo a thug dhuinn tuigse mu dheagh chleachdadh aig buidhnean coltach rinne agus SSIs stèidhichte, agus deagh shealladh agus misneachd mun obair a tha romhainn.

Tha dùil ann gun tèid an Seanadh a stèidheachadh gu foirmeil tràth sa bhliadhna 2023.

Tha fiosrachadh air an raon-obrach, ballrachd is dòigh taghaidh cho math ri geàrr-iomradh air an structar riaghlaidh ùr rim faighinn sa phàipear ‘Seanad SMO – Comas’.

Tha sinn a’ cumail tachartas co-chomhairleachaidh air 23 Samhain 2022 aig 1f ann an Seòmar Shomhairle agus le ceangal air loidhne, airson beachdan Roinn an Fhoghlaim air fad a thrusadh air stèidheachadh Seanadh an t-Sabhail. Bidh sinn a’ cumail co-chomhairleachadh le oileanaich cuideachd. Faodar beachdan a thilleadh air loidhne gu h-ìosal cuideachd ro 5f air 24 Samhain 2022. Tha sinn an dòchas gun leig am pròiseas seo leinn gach ceist as urrainn a fhreagairt agus beachdan luchd-obrach is oileanaich a chnuasachadh. Thèid am pàipear deireannach a chur air adhart airson aonta aig an ath choinneimh den Bhòrd san Dùbhlachd 2022.