COTHROMAN OBRACH
Is e Sabhal Mòr Ostaig aon de na fastaichean as motha anns an Eilean Sgitheanach a’ tabhann chothroman-obrach fad-bliadhna. Le còrr is 100 neach-obrach, tha sinn a’ cur fàilte air iarrtasan bho dhuine sam bith a tha airson a bhith an lùib coimhearsnachd-obrach a tha brosnachail, a chuireas luach sa chànan agus a tha a’ tuigsinn cho cudromach ‘s a tha obair sgioba ann a bhith a’ cur ri iomairt na Gàidhlig.
Tha co-ionannachd chothroman aig cridhe an t-Sabhail, agus tha sinn airson ‘s gum bi cothrom aig duine sam bith air an cànan prìseil seo a chleachdadh nan obair làitheil. Leis a sin, tha sinn a’ creidsinn nach bu chòir ciorram, aois, ùine ann an cùram, gnè, nàiseantachd no fèin-aithne bacadh a chur ort sin a dhèanamh.
Far a bheil a’ Ghàidhlig riatanach anns an dreuchd, tha na sanasan obrach againn ann an Gàidhlig a-mhàin. Far a bheil sanas dà-chànanach, bhiodh e math nan robh Gàidhlig agad, ach tha cothroman ionnsachaidh gan tabhann mar phàirt den obair. Faic na cothroman obrach gu h-ìosal.
MANAIDSEAR AN IONAD – FÀS MÒR
Tuarastal: £30,168 – £34,985 a rèir teisteanasan is eòlais
Cùmhnant: Maireannach, Làn-ùine
’S e ionad cùraim-chloinne Ghàidhlig a th’ ann am Fàs Mòr a tha stèidhichte aig Bun-sgoil Shlèite san Eilean Sgitheanach. Gheibh clann aois 0-12 cùram againn ann an àrainneachd chàirdeil, altramach is bhrosnachail agus tha àite cudromach againn sa choimhearsnachd ionadail againn cuideachd.
Tha sinn a’ sireadh Manaidsear an Ionaid gus ar sgioba beag, càirdeil a stiùireadh. Seo cothrom air leth do chuideigin aig a bheil eòlas air cùram-chloinne agus dreuchdan stiùiridh agus aig a bheil dealas airson a bhith a’ gabhail cùram de chloinn ann an àrainneachd Ghàidhlig sa bheilear a’ cur taic ri math agus adhartas na cloinne.
Bidh e an urra ris an neach a gheibh an obair an t-seirbheis a ruith bho latha gu latha, agus nì iad cinnteach gu bheil ìrean àrda gan coileanadh a thaobh cùram, riaghailtean is laghan agus stiùireadh na h-obrach, agus bidh iad cuideachd a’ brosnachadh deagh dhàimh ri clann, teaghlaichean, luchd-obrach agus buidhnean com-pàirteach.
Ma tha thu am beachd cur a-staigh airson na dreuchd seo, bu chòir teisteanas SVQ3 Seirbheisean Sòisealta (Clann is Daoine Òga) aig ìre SCQF 7, no HNC Obair le Clann, no teisteanas ionann ri sin a bhith agad, agus bu chòir teisteanas stiùiridh freagarrach a bhith agad mar a dh’fheumar fo riaghailtean SSSC no feumaidh tu a bhith deònach obair gus leithid a theisteanas a thoirt a-mach.
- Tha sinn a’ tabhann chothroman trèanaidh is sgeama peinnsein
- Ma thèid d’ fhastadh, bidh agad ri pàirt a ghabhail san sgeama PVG
Cuir fios gu Gill Morgan airson tuilleadh fiosrachaidh. Seòladh puist-d:
Gus cur a-staigh airson na dreuchd, faodaidh tu foirm-iarrtais a chur gu:
Tuairisgeul Obrach (PDF)
Foirm Iarrtais (PDF)
Foirm Iarrtais (Doc)
Foirm Co-ionannachd (Doc)
OIFIGEAR CÀRAIDH
Tuarastal: £26,890 – £31,671
Uairean: 35 uairean a thìde san t-seachdain
A bheil thu practaigeach, rianail agus moiteil nuair a thèid obair mhath a dhèanamh?
Tha sinn a’ sireadh Oifigear Càraidh a bhios ag obair còmhla ri Sgioba na h-Oighreachd gus ar toglaichean, fearann agus goireasan a ghleidheadh is a chumail ann an deagh staid. Nì thu obair chudromach ann a bhith a’ dèanamh cinnteach gu bheil ar n-àrainn sàbhailte, aoigheil agus sgiobalta do dh’oileanaich, luchd-obrach agus luchd-tadhail.
’S iomadh dleastanas practaigeach a bhios agad san dreuchd seo: bidh thu ri obair ghleidhidh chunbhalach, ri obair ghleidhidh is chàraidh gus dèiligeadh ri diofar rudan a dh’èireas, agus bidh thu a’ gleidheadh is a’ sgioblachadh fearann na colaiste, a’ toirt taic seachad a thaobh slàinte is sàbhailteachd, a’ cur sheòmraichean air dòigh airson tachartasan agus ag obair còmhla ri cunnradairean agus co-obraichean air feadh na buidhne.
Na Comasan agad
Bidh na leanas fìor mu do dheidhinn-sa:
- Eòlas air obair ghleidhidh airson toglaichean, fearann no goireasan.
- Sgilean gleidhidh is càraidh practaigeach.
- Deagh sgilean eagrachaidh is conaltraidh.
- Cead-dràibhidh iomlan.
Ma tha thu a’ sireadh dreuchd phractaigeach far am faic thu an diofar a nì an obair agad gach latha, b’ fhìor thoil leinn cluinntinn bhuat.
Airson tuilleadh fiosrachaidh, cuir post-d gu
Gus cur a-staigh airson na dreuchd, faodaidh tu foirm-iarrtais a chur gu:
Tuairisgeul Obrach (PDF)
Foirm Iarrtais (PDF)
Foirm Iarrtais (Doc)
Foirm Co-ionannachd (Doc)
CÒCAIRE Commis/ Chef de Partie
Tuarastal: £25,093 – £26,890 (a rèir eòlais)
Uairean: 35 uairean gach seachdain, ag obair 5 latha a-mach à 7
Tha Sabhal Mòr Ostaig a’ sireadh Iar-chòcaire gus cuideachadh le bhith ag ullachadh biadh fìor mhath do dh’oileanaich, luchd-obrach, luchd-tadhail is aoighean.
Fiosrachadh mun Dreuchd
Bidh thu a’ cuideachadh le bhith ag ullachadh biadh agus le seirbheisean bìdh, a’ frithealadh air diofar fheumalachdan daitheid, agus bidh thu a’ cuideachadh le bhith a’ dèanamh cinnteach gun tèid obair a’ chidsin a dhèanamh gu math, gu sàbhailte agus gu h-èifeachdach. Mar phàirt dhen dreuchd bidh thu a’ cuideachadh le biadh airson tachartasan agus le bhith a’ toirt leasachadh air clàran-bìdh is seirbheisean.
Na sgilean is comasan agadsa
- Teisteanas còcaireachd proifeiseanta no eòlas-obrach a tha ionnan ri sin
- Eòlas air a bhith ag obair ann an cidsin trang
- Eòlas air slàinteachas is sàbhailteachd bìdh
- ’S urrainn dhut a bhith ag obair gu math mar phàirt de sgioba agus nuair a bhios cùisean trang
- Deònach a bhith ag obair air an oidhche agus aig an deireadh-sheachdain aig amannan
- ’S urrainn dhut Gàidhlig a bhruidhinn, no tha thu deònach a h-ionnsachadh
Na tha sinne a’ tabhainn
- 35 làithean-saora gach bliadhna
- Biadh nuair a bha thu ag obair
- Sgeama peinnsein
- Cothroman trèanaidh is leasachaidh
- Cothrom a bhith ag obair ann an àite glè shònraichte san eilean
A’ cur iarrtas a-steach
Gus bruidhinn mun dreuchd, cuir fios gu Kirsteen McGonagall: | 01471 888250
Gus cur a-staigh airson na dreuchd, faodaidh tu am foirm-iarrtais agad a chur gu .
Tuairisgeul Obrach (PDF)
Foirm Iarrtais (PDF)
Foirm Iarrtais (Doc)
Foirm Co-ionannachd (Doc)
LUCHD-TAIC SGIOBA GHLANAIDH
Làn-ùine / Pàirt-ùine
Tuarastal: £24,479 (pro rata)
Thig a dh’obair mar phàirt den sgioba de luchd-taic aoigheachd againn aig Sabhal Mòr Ostaig. Tha dreuchdan bàn againn an-dràsta airson Luchd-taic Sgioba Ghlanaidh làn-ùine is pàirt-ùine. Tha dleastanasan a’ gabhail a-steach glanadh agus seirbheiseachadh seòmraichean-cadail oileanach/aoigheachd, oifisean, seòmraichean-teagaisg, seòmraichean-cuirm agus raointean poblach agus a bhith a’ deasachadh seòmraichean-coinneimh agus ag ullachadh airson tachartasan taobh a-staigh na Colaiste.
Chan eil feum air eòlas roimhe seo oir bidh Iàn threànadh air a thoirt seachad, cho math ri cothrom Gàidhlig ionnsachadh no a leasachadh. Dh’fhaodadh gum bi àite-fuirich ri fhaighinn.
- Cothroman cosnaidh fad na bliadhna
- Tuarastal farpaiseach
- 35 làithean dheth pàighte sa bhliadhna
- Sgeama peinnsein
- Seòmar eacarsaich
Bu chòir iarrtasan-obrach a chur gu
Foirm Iarrtais (PDF)
Foirm Iarrtais (Doc)
Foirm Co-ionannachd (Doc)
BUILL BÒRD STIÙIRIDH AN T-SABHAIL
Tha Sabhal Mòr Ostaig, Ionad Nàiseanta Cànan is Cultar na Gàidhlig, a’ sireadh bhall ùra airson ar Bòrd Stiùiridh.
Seo cothrom air leth gus cuideachadh le riaghladh na Colaiste, agus bidh sibh ag obair còmhla ri Buill a’ Bhùird, luchd-obrach agus oileanaich gus cànan agus cultar na Gàidhlig a chur air adhart. Le Achd nan Cànan Albannach 2025, chunnacas clach-mhìle chudromach san iomairt gus tuilleadh aithne is taice a thoirt dhan Ghàidhlig agus mar sin tha cothrom agaibh a bhith ag obair còmhla rinn aig Sabhal Mòr Ostaig aig àm fìor dhòchasach dhan chànan.
’S e dreuchd shaor-thoileach a tha seo, far am faigh sibh cothrom sònraichte gus cuideachadh le amasan is lèirsinn na Colaiste, riaghladh na Colaiste, ar ro-innleachd ionmhasail agus le bhith a’ dèanamh cinnteach gun toir ar n-obair buaidh air cànan, foghlam is cultar na Gàidhlig thar na h-ùine fada.
Thathar a’ cur fàilte air iarrtasan bho thagraichean bho gach raon is roinn, agus thathar gu sònraichte a’ sireadh iarrtasan bho dhaoine aig a bheil eòlas air Foghlam Àrd-ìre, conaltradh ro-innleachdail no co-chonaltradh is cùisean poilitigeach.
Thèid coinneamhan a’ Bhùird a chumail ann an Gàidhlig, mar sin feumaidh sibh a bhith fileanta sa chànan. Chan fheum eòlas a bhith agaibh air mar a bhios Bùird Stiùiridh ag obair, oir gheibh sibh taic le sin ma bhios sibh feumach air.
Ma tha a’ Ghàidhlig cudromach dhuibh agus ma tha ùidh agaibh sa chothrom seo, cuiribh fios gu airson tuilleadh fiosrachaidh.
Bu chòir iarrtasan-obrach a chur gu
Tuairisgeul Obrach (PDF)
Foirm Iarrtais (Doc)
Brath Prìobhaideachd – Buill a Bhùird
Foirm Co-ionannachd (Doc)