
Foillseachadh Plana Cànain Sabhal Mòr Ostaig airson co-chomhairle phoblaich
Chaidh Plana Cànain Shabhal Mòr Ostaig OGE, an t-Ionad Nàiseanta airson Cànan is Cultar na Gàidhlig, a chur air bhog an-diugh le cothrom aig a’ mhòr-shluagh beachdan a chur mu choinneamh.
Fhuair Sabhal Mòr iarrtas bho Bhòrd na Gàidhlig plana cànain a dheasachadh fo chùmhnantan Achd na Gàidhlig (Alba) 2005 am measg buidheann de cholaistean is oilthighean eile air an deach iarraidh plana a sgrìobhadh. Chaidh am Plana a dheasachadh le Oifigear Leasachaidh Cànain na Colaiste agus luchd-obrach eile a tha mion-eòlach air leasachadh is planadh cànain. Tha am Plana a’ togail air Poileasaidh Cànain na Colaiste a bh’ ann roimhe agus a’ neartachadh cleachdadh na Gàidhlig am measg oileanaich agus luchd-obrach an t-Sabhail.
Thuirt Prionnsapal na Colaiste, An t-Oll. Boyd Robasdan:’Chaidh Sabhal Mòr Ostaig a stèidheachadh air an fheallsanachd gun e àite-ionnsachaidh làn-Ghàidhlig, àite-obrach làn-Ghàidhlig agus coimhearsnachd làn-Ghàidhlig a bhiodh ann. Tha am Plana Cànain a’ cur an cèill gu soilleir na tha tachairt an seo gus inbhe agus cleachdadh a’ chànain a bhrosnachadh agus mar a thèid oirnn air àrainneachd Ghàidhlig na Colaiste a neartachadh.
‘Tha sinn an dòchas gum bi am Plana seo mar fìor dheagh eisimpleir do bhuidhnean eile agus gun gabh daoine an cothrom na beachdan aca mun Phlana a chur thugainn.’
Thuirt Ceannard Bòrd na Gàidhlig, Iain Aonghais MacAoidh:’Tha inbhe aig Sabhal Mòr Ostaig mar ionad sàr mhathais nàiseanta airson na Gàidhlig an Alba is tha e ceart is cothromach gum biodh an Sabhal na dheagh eisimpleir air ionnsachadh is cleachdadh cànain anns gach suidheachadh. Gus sin a thoirt gu buil tha gach cuid poileasaidh is plana gnìomh cudromach. Tha sinn a’ cur fàilte air an iomairt seo agus a’ coimhead air adhart ri thoraidhean.’
Thèid am Plana Cànain aig Sabhal Mòr Ostaig a chur a-steach gu Bòrd na Gàidhlig air 31 An Dàmhair 2011. Tha am Plana agus foirm luachaidh ri fhaotainn air làrach-lìn na Colaiste agus bidh cothrom aig daoine air beachdan a nochdadh mu dheidhinn gus an latha sin fhèin.