
Tobar an Dualchais – Kist o Riches
’S e goireas air-loidhne a th’ ann an Tobar an Dualchais a tha ag amas air clàraidhean-fuaim de chultar na h-Alba a thaisbeanadh agus àrdachadh. Tha òrain, ceòl, eachdraidh, bàrdachd, beul-aithris agus sgeulachdan am measg nam prìomh stuthan anns na clàraidhean seo, a chaidh a thogail bho na 1930an suas. Thàinig na clàraidhean bho air feadh Alba agus tha clàraidhean ri fhaighinn ann an Gàidhlig, Albais agus Beurla.
’S e prìomh amas Tobar an Dualchas dèanamh cinnteach gum bi beul-aithris bheairteach na h-Alba air a ghleidheadh agus ri fhaotainn do na ginealaichean ri teachd.
Tha na clàraidhean-fuaim a’ tighinn bho thrì cruinneachaidhean mòra. ’S iad sin: Sgoil Eòlais na h-Alba (Oilthigh Dhùn Èideann); Cruinneachadh Chanaigh aig Urras Nàiseanta na h-Alba; agus BBC ALBA.
‘S e seo eisimpleir no dhà bhon làraich:
- Tha Aonghas MacIllFhialain à Fròbost an Uibhist a Deas ag aithris ‘Duan na Ceàrdaich’, duan Oiseanach a tha ag innse mar a chaidh Fionn MacCumhail agus na gaisgich aige gu ceàrdach dhraoidheil, oir is gum biodh Mac an Luinn, an claidheamh aig Fionn, air fhaghairt às ùr. Chaidh an duan seo a chlàradh ann an 1949 le Iain Latharna Caimbeul.
- S e òran bothain a th’ ann an ‘Drumledgie’ agus tha e air a ghabhail an seo le Jimmy MacBeath à Port Saoithe aig Cèilidh Fèis nan Daoine ann an 1952. ’S e fear an taighe Hamish Henderson.
- Seo Màiri Munro (Màiri Sheonaidh a’ Ghobha) à Loch Baghasdail an Uibhist a Deas, a’ gabhail an òrain luaidh ‘Hò Fàil O-ho Ghràidh’ ann an clàradh a rinn Dòmhnall Eairdsidh Dòmhnallach ann an 1962.
- Bhuineadh Stanley Robertson à Obar Dheathain do Luchd-siubhail Albannach. Anns a’ chlàradh seo bho 1982, tha e ag innse sgeulachd mu sheann chàraid agus bonnach draoidheil.
- Tha Lachlann Dòmhnallach ag innse do Cheit Anna NicCoinnich mu làithean òige ann an Hiort, ann am prògram ‘Dealan-dè’ bho 1985.