Tha an stiùireadh a leanas air a thoirt seachad le Sabhal Mòr Ostaig mar chuideachadh, agus bu chòir dha daoine a bhith mothachail ro làimh air ma tha iad an dùil teantaichean agus carbad-còmhnaidh a thoirt air an làraich.
Chan e làrach campachaidh oifigeil a th’ ann an Sabhal Mòr Ostaig agus, mar sin, chan eil goireasan iomchaidh againn airson teantaichean is carbadan-còmhnaidh. Tha sinn deònach beachdachadh air leigeil le carbadan-còmhnaidh tighinn air làrach na Colaiste le feadhainn a tha a’ frithealadh chùrsaichean aig amannan far a bheil na h-àitichean-fuirich againn làn.
Tha an t-uallach airson teàrainteachd agus slàint’ is sàbhailteachd a’ tuiteam air luchd cleachdaidh nan teantaichean agus carbadan-còmhnaidh fhèin fhad ’s a bhios iad air an làraich. Feumar cuideachd gabhail ris mus tig iad NACH E làrach campaidh a tha seo agus NACH EIL goireasan iomchaidh ann da rèir.
Tha e riatanach gun tèid leigeil fhaicinn ro làimh do Sgioba nan Cùrsaichean Goirid ma tha neach sam bith an dùil fuireach ann an carbad-còmhnaidh air an làraich. Nì Sabhal Mòr Ostaig a dhìcheall coinneachadh ri gach iarrtas, ach chan eil cinnt sam bith gun tèid àite parcaidh iomchaidh a lorg, oir tha làrach na Colaiste an còmhnaidh trang le carbadan nan oileanach is an luchd-obrach, gu h-àraidh tro mhìosan an t-samhraidh.
Bi mothachail nach eil àitichean sònraichte ri fhaotainn air an làraich airson ceanglaichean dealain a dhèanamh. Ach, ma tha carbad-còmhnaidh le ceanglaichean freagarrach stèidhte faisg air a’ Cholaiste, ‘s urrainnear iarrtas a chur a-steach gus an carbad a cheagal ri togalach airson £5 gach leth-latha: madainn (08:00 – 12:00) air neo feasgar (14:00 – 18:00). Ma tha feum air ceangal dealain tron oidhche, bidh cosgais £10 gach oidhche ann. Feumar seo a rèitheachadh le Sgioba nan Cùrsaichean Goirid aig an seisean clàraidh madainn Diluain a phàigheadh ro làimh.
Chan fhaodar air dòigh sam bith feuchainn ri cuidhteas fhaighinn de dh’òtrachas nan carbadan-còmhnaidh tro siostam òtrachais na Colaiste fhèin. Feumar na tancaichean fhalmhachadh aig àitichean iomchaidh airson a leithid air falbh bhon Cholaiste.
Tha e riatanach gun tèid leigeil fhaicinn ro làimh ri Sgioba nan Cùrsaichean Goirid ma tha neach sam bith an dùil teanta a chleachdadh air an làraich. Thèid fios a chumail air càit am bu chòir an teanta a chur suas agus air na puingean a leanas:
- Tha smocadh toirmisgte sna teantaichean
- Bu chòir co-dhiù 6m (20ft) fhàgail eadar teantaichean
Tha goireasan taighean-beaga rim faotainn fad an latha is air an oidhche air seann làrach na Colaiste aig Àrainn Ostaig. Thoir an aire gur iad goireasan airson muinntir na Colaiste air fad a th’ annta seo ri taobh an Talla Mhòir agus bidh iad a’ fàs gu math trang nuair a bhios tachartasan a’ dol san Talla. Chan eil goireas fras ri fhaotainn an seo idir.
Faodar fras a ghabhail sa Phrìomh Thogalach aig Àrainn Chaluim Chille, a tha fosgailte eadar 08:00 is 22:00 gach latha.
Air adhbharan slàint’ is sàbhailteachd, chan eil e ceadaichte teine no BBQ a lasadh ri taobh teanta no carbad-còmhnaidh air làraich na Colaiste. Ma thèid a leithid fhaicinn leis an luchd-glèidhidh, thèid iarraidh a chur às. Tha cothrom air biadh a cheannach tron latha bhon Cholaiste fhèin, agus ‘s urrainnear BBQ a lasadh taobh a-staigh an amharclann cloiche a-mhàin a tha air beulaibh a’ Phrìomh Thogalaich.
Feumar sgudal a chruinneachadh agus a chur dhan na bionaichean air feadh na h-àrainne agus an t-àite fhàgail mar a bha às dèidh dhut teanta a leagail aig deireadh a’ chùrsa.
Tha siostaman teàrainteachd air na h-àitichean-fuirich a-nis agus mar sin, chan urrainn do luchd-campaidh cidsinean no seòmraichean-suidhe a chleachdadh sna toglaichean-fuirich. Faodar am portacabin Comunn nan Oileanach aig Àrainn Ostaig (AO) a chleachdadh, anns a bheil àmhainn microwave, frids, sinc agus taigh-beag. Chan eil cucair ann, agus chan eil e ceadaichte stòbha campachaidh a chleachdadh taobh a-staigh an togalaich nas motha.
