Sgoilearachd Ealain Jon Schueler ga Tabhann aig Sabhal Mòr Ostaig
Tha Sabhal Mòr Ostaig, Ionad Nàiseanta Cànan is Cultar na Gàidhlig, gu bhith tabhann sgoilearachd ùr, eadar-nàiseanta airson nan ealain lèirsinne do neach-ealain a thig air mhuinntireas chun na colaiste.
’S e com-pàirteachas air leth sònraichte a th’ ann an Sgoilearachd Jon Schueler eadar Sabhal Mòr Ostaig ann an Alba is Urras Carthannais Jon Schueler ann an New York agus bidh e a’ cur ri toraidhean prògram an luchd-ealain air mhuinntireas aig SMO a tha faighinn taic bho Alba Chruthachail tron phrògram aca, Cinn-uidhe Chruthachail. Gach bliadhna, gheibh neach-ealain eadar-dhealaichte cothrom air an sgoilearachd a thèid a thabhann eadar 2013 – 2016. Chaidh a stèidheachadh mar chuimhneachan air beatha, obair is buaidh an neach-ealain chliùitich Jon Schueler (1916 – 1992), peantair eas-chruthach, ‘expressionist’, agus mar chomharra air an dàimh làidir a bh’ aige ri cruth-tìre is àrainneachd na Linne Slèitich.
Thuirt Donaidh Rothach, An Stiùiriche aig Sabhal Mòr Ostaig airson Leasachaidh, Togail Airgid agus nan Ealain: “Tha sin uabhasach toilichte gun d’fhuair sinn an cothrom seo sgoilearachd airson nan ealain lèirsinne a thabhann ann an com-pàirt ri Urras Schueler. Tha e gu math iomchaidh gu bheil an luchd-ealain a gheibh an sgoilearachd gu bhith stèidhichte aig a’ cholaiste ann an Slèite, sgìre far an do chuir an neach-ealain eadar-nàiseanta, iomraiteach seo uiread ùine seachad ag obair san stiùidio bheag aige le sealladh air an Linne Shlèiteach. Agus tha e gu sònraichte iomchaidh gum bi sinn a’ tabhann na sgoilearachd seo suas gu 2016, a’ bhliadhna anns am bi sinn a’ comharrachadh gu bheil ceud bliadhna ann bhon a rugadh Jon Schueler. Thug an Linne Shlèiteach buaidh mhòr is buaidh làidir air obair an t-sàr neach-ealain seo agus leis an sgoilearachd seo, tha sinn a’ comharrachadh is a’ dèanamh gàirdeachais ris an dàimh iongantach a bha eadar an sgìre is an duine.”
A rèir Amanda Catto, Manaidsear le Uallach aig Alba Chruthachail airson Às-mhalairt Eadar-nàiseanta is Cultarach agus nan Ealain Lèirsinne: “Tha Alba Chruthachail a’ cur fàilte air a’ chom-pàirteachas ùr seo eadar Sabhal Mòr Ostaig ann an Alba agus Urras Carthannais Jon Schueler ann an New York. Togaidh e air toraidhean a’ phrògraim chòmhnaidhich fharsaing a fhuair taic tron phrògram, Cinn-uidhe Chruthachail, agus gheibh an luchd-ealain cothrom a bhith ag obair ann an àrainneachd thogarrach gus an cuid obrach a leasachadh.”
Thuirt Kath NicLeòid, an t-Oifigear Leasachaidh Ealain aig SMO: “Faodaidh luchd-ealain eadar-nàiseanta, Albannach no bhon RA – a tha ag obair aig an ìre as àirde ann am meadhan lèirsinne agus aig a bheil ùidh shònraichte ann an cruth na tìre agus an àrainneachd – cur a-steach airson na Sgoilearachd. Leis an Sgoilearachd, bidh cothrom aig luchd-ealain lèirsinne a bhith ag obair ann an Stiùidio nan Ealain Lèirsinne againn fad grunn mhìosan as t-samhradh is as t-fhoghar, ann an àite far am bi iad air an cuairteachadh le daoine cruthachail eile a tha ri obair-ealain de dhiofar sheòrsaichean agus far am bi iad air am bogadh ann an cultar brìoghmhor na sgìre. ’S cinnteach, le neach-ealain ann an suidheachadh obrach mar sin, gun èirich grunn chothroman inntinneach dhaibh gus a bhith ag obair còmhla ri daoine eile.”
Thathar a-nis a’ sireadh iarrtasan airson Sgoilearachd Jon Schueler airson nan Ealain Lèirsinne, agus thig a’ chiad neach-ealain air mhuinntireas as t-samhradh 2013. Bidh cothrom aig an neach a gheibh an sgoilearachd, a bhith rannsachadh, a’ a’ cur air adhart pròiseactan is ag obair fad 3 mìosan ann an stiùidio ealain air leth ghoireasach le sealladh iongantach air an Linne Shlèiteach, an caolas a thug uiread buaidhe air Schueler fhèin mar neach-ealain.
Aig deireadh na h-ùine còmhnaidhich aca, bidh cothrom aig an neach-ealain taisbeanadh dhen obair aca a chur air dòigh, agus thathar an dòchas gun tèid taisbeanadh sònraichte de ‘Thoraidhean Sgoilearachdan Jon Schueler’ a chumail aig deireadh nan ceithir bliadhna le obair bhon luchd-ealain uile a fhuair sgoilearachd.
Bu chòir iarrtasan airson Sgoilearachd Jon Schueler na bliadhna-sa a bhith a-staigh ro 7 Faoilleach 2013. Airson tuilleadh fiosrachaidh, tadhlaibh air http://www.smo.uhi.ac.uk/en/ealain-is-cultar/jon-schueler