SGOILEARACHD JON SCHUELER

Neach-ealain Lèirsinne air Mhuinntireas

Tha e a’ toirt toileachas mòr do Shabhal Mòr Ostaig agus Urras Carthannach Jon Schueler an naidheachd fhoillseachadh gum bithear a’ tairgse cothrom do dhaoine air Sgoilearachd Jon Schueler a-rithist. Tha an sgoilearachd a’ toirt cothrom do neach-ealain lèirsinne trì mìosan a chur seachad air mhuinntireas aig Ionad Nàiseanta Cànan is Cultar na Gàidhlig, ann an Slèite san Eilean Sgitheanach. 

Chaidh an sgoilearachd a stèidheachadh gus comharra a dhèanamh agus cuimhne a chumail air beatha, obair agus buaidh an neach-ealain chliùitich agus a’ pheantair eascruthaich, Jon Schueler (1916-1992). Thug cruth-tìre is àrainneachd na Linne Shlèitich buaidh mhòr air obair Schueler agus bha dlùth-cheangal eadar an neach-ealain agus an àrainneachd sin. 

Leis a’ ghreis seo air aoigheachd, gheibh neach-ealain lèirsinne proifeiseanta cothrom air leth gus trì mìosan a chur seachad air mhuinntireas ann an stiùidio ealain sònraichte air oirthir an Eilein Sgitheanaich le seallaidhean eireachdail air an Linne Shlèitich. Thathar an dùil gum foillsich an neach-ealain air mhuinntireas an obair aca ann an taisbeanadh poblach aig deireadh na h-ùine aca. 

Tha iarrtasan airson a’ phrògraim chliùitich eadar-nàiseanta seo a-nis fosgailte, agus ‘s e 14 Samhain 2025, 5f (GMT) an ceann-latha dùnaidh airson iarrtasan.

Chan eil cìs iarrtais ann. Thèid a’ ghreis air mhuinntireas a chumail as t-samhradh/as t-fhoghar 2026.

Riatanasan Iarrtais

Thèid iarraidh air luchd-iarrtais am fiosrachadh a leanas a chur ris an fhoirm-iarrtais an seo.

1. Fiosrachadh Pearsanta

• Ainm slàn
• Seòladh
• Seòladh puist-d

2. Dearbhadh Iomchaidheachd

• Dearbhadh gu bheil an neach-iarrtais air a bhith taobh a-muigh foghlam foirmeil fad trì bliadhna aig a’ char as lugha.

3. Aithris Sgrìobhte

• Aithris Neach-ealain (200 facal): Meòrachadh air an dòigh-obrach, na cuspairean is na h-adhbharan ealanta agad.
• Geàrr-chunntas Neach-ealain (200 facal): Cunntas goirid air do shlighe-obrach, na choisinn thu agus taobh na h-ealain agad an-dràsta.
• Moladh Greis Chòmhnaidh: Cunntas mionaideach air na rannsaicheadh, na leasaicheadh is na bheireadh tu gu buil sa ghreis air mhuinntireas.

4. Sgrìobhainnean Taic

• Cunntas-beatha: Fiosrachadh air taisbeanaidhean, greisean còmhnaidh, foillseachaidhean is eòlas iomchaidh sam bith eile.
• Tuairmse air Cosgaisean Siubhail: Mìneachadh air cosgaisean siubhail ris am bitheadh dùil, is tu a’ tighinn gu/a’ fàgail na greis air mhuinntireas.
• Liosta Obraichean: Tiotalan, cinn-latha, meadhanan is tuairisgeulan goirid air taghadh de dh’obraichean ealain.
• Faidhlichean Ceangailte: Eisimpleirean lèirsinneach de do chuid obrach (ìomhaighean, PDFan is eile).

Thèid tagraichean soirbheachail a chur ri geàrr-liosta agus thèid cuiridhean gu agallamh a sgaoileadh nuair a bhios gairm nan iarrtasan dùinte. 

Tha am foirm-iarrtais ri fhaighinn an seo.