Tuairisgeul pearsanta

Tha Sìneag NicDhonnchaidh a’ teagasg aig Sabhal Mòr Ostaig air a’ Chùrsa Chomais agus air a’ Chùrsa Inntrigidh.

Choisinn Sìneag BSc (le Urram) ann am Bith-cheimigeachd bho Oilthigh Chill Rìmhinn, mus tàinig i a Shabhal Mòr Ostaig gu bhith na h-oileanach air a’ Chùrsa Chomais – cùrsa air a bheil i a-nis a’ teagasg. Lean i oirre air a’ chùrsa Gàidhlig is Ceòl Traidiseanta, far an d’ fhuair i oideachadh ann an òrain Ghàidhlig bho Christine Primrose.

Thòisich i air obair làn-ùine aig Sabhal Mòr Ostaig ann an 2022 agus tha i air a bhith an sàs ann an diofar roinnean den Cholaiste on uair sin: a’ cur air dòigh chlasaichean is tachartasan dhan choimhearsnachd; a’ deasachadh is a’ teagasg chùrsaichean sònraichte do bhuidhnean bho thaobh a-muigh; a’ teagasg air a’ Chùrsa Dhrochaid is air Cùrsaichean Goirid; agus ag obair ann an Seirbhisean nan Oileanach ann an dlùth chom-pàirteachas leis na h-oileanaich fhèin.

Cluinnidh tu Sìneag a’ seinn fhathast agus tha ùidh mhòr aice ann a bhith a’ cleachdadh òrain, is na sgeulachdan air an cùlaibh, anns an teagasg aice mar mhodh ionnsachaidh gus puingean cànain, fuaimneachadh is briathrachas a thogail is a dhaingneachadh.