TAIC LE CIORRAM

Tha co-ionnanachd chothroman aig cridhe dòigh-obrach Shabhal Mòr Ostaig. Gheibh gach oileanach an aon seirbheis a dh’aindeoin aoise, cinnidh, ciorraim, creideimh, datha, gnè, taobhadh feise no taobhadh poilitigeach.

Cuiridh sinn fàilte chridheil air iarrtasan bho dhaoine le ciorram, no aig a bheil feumlachdan taic a bharrachd. Tuigidh sinn gum bi feadhainn le ciorram tric airson seo a chumail prìobhaideach, ach ma dh’innseas tu dhuinn, faodaidh sinn an ìre as fheàrr de thaic a thabhann dhut.

Faodaidh tu fios a leigeil aig àm sam bith: nuair a chuireas tu iarrtas a-steach; aig àm-clàraidh; fhad ‘s a tha an cùrsa a’ dol; air neo le bhith bruidhinn ris an stiùiriche cùrsa no comhairliche foghlaim agad no ri sgioba Seirbheisean Taic Oileanach.

Gheibh gach oileanach fiosrachadh mu phoileasaidhean na Colaiste air co-ionnanachd chothroman is ciorraim cho math ri fiosrachadh iomchaidh sam bith eile a dh’innseas dhut dè nì a’ Cholaiste airson do chuideachadh.

Tuigidh sinn gu bheil e doirbh fios a leigeil mu chiorram, ach le bhith ag innse dhuinn, bidh cothrom againn an ìre as àirde de thaic is chuideachadh a thoirt seachad. Bheir seo cothrom dhuinn atharrachaidhean reusanta iomchaidh a dhèanamh air do shon ceangailte ri teagasg no àiteachan-fuirich; teicneolas cuideachail; barrachd cuideachaidh gus taic-airgid fhaighinn; agus rèiteachadh sònraichte aig àm nan deuchainnean is mar sin air adhart.

Mas e duine le ciorram a th’ annad, tha sinn a’ moladh gum bruidhinn thu rinn mu dheidhinn cho luath ‘s a ghabhas.