Riaghladh
Tha Sabhal Mòr Ostaig na chompanaidh earranta agus na charthannas, air a riaghladh leis a’ Bhòrd Stiùiridh. Tha uallach air a’ Bhòrd airson roi-innleachd agus riaghladh na Colaiste. Aig ìre gnìomh, tha mòran dleastanasan a’ Bhùird air an riarachadh air Buidheann Stiùiridh na Colaiste, A’ Bhòrd Acadaimigeach agus comataidhean eile air feadh na Colaiste
Poileasaidhean agus Stuthan Laghail
Tha iomadach poileasaidh agus modh-obrach ann aig a bheil buaidh air luchd-obrach agus oileanaich. Tha barrachd fiosrachaidh ri fhaighinn anns an earrainn air Poileasaidhean agus fo dhuilleagan Achd Saorsa an Fhiosrachaidh. Airson fios a bharrachd, faodaidh sibh post-d a chuir gu Sarah-Jane Chaimbeul.
RO-INNLEACHD 2023-28
Tha Ro-innleachd Shabhal Mòr Ostaig 2023-28 air a foillseachadh air a’ bhliadhna a tha Sabhal Mòr Ostaig air leth-cheud bliadhna a ruigsinn, tha an ro-innleachd ùr seo a’ togail air an t-uabhas a chaidh a choileanadh san àm a dh’fhalbh, agus air na comharran air fàs ann an ionnsachadh agus ùidh sa Ghàidhlig air feadh Alba.
’S e ar lèirsinn, airson an ath chòig bliadhna, gum bi sinn nar sàr ionad Gàidhlig, a’ tairgsinn chothroman ionnsachaidh, rannsachaidh agus cultarach a tha barraichte, gum faigh gach duine againn cothrom a bhith ealanta sa chànan agus sa chultar, agus sinn nar tosgairean dhan Ghàidhlig.
Faodar an Ro-innleachd slàn a leughadh gu h-ìosal.