Aodann a’ Chomainn!
Cò thu, agus cò às a tha thu?
Is mise Eilidh Russell agus ’s ann à Inbhir Nis a tha mi.
Dè an cùrsa air a bheil thu?
Tha mi air an dàrna bhliadhna a’ dèanamh ceum ann an Gàidhlig is Foghlam.
Dè na cur-seachadan a th’ agad?
Is toil leam a bhith a’ snàmh air a’ bhlàr a-muigh agus is toil leam a bhith a’ dèanamh croiseadh.
Dè na 3 rudan as fheàrr mu dheidhinn a bhith nad oileanach aig Sabhal Mòr Ostaig?
Na cèilidhean, caraidean gu math dlùth agus a’ faireachdainn mar phàirt de choimhearsnachd Ghàidhlig làidir.
Carson a thagh thu a bhith an sàs le Comann nan Oileanach am-bliadhna?
Bha mi ag iarraidh pàirt a ghabhail ann a bhith a’ cur thachartasan air dhòigh, agus bha mi den bheachd gum biodh e na chothrom leasachaidh math dhan mhisneachd agam.
Dè seòrsa rudan a bhios tu fhèin a’ dèanamh mar Cheann-suidhe a’ Chomainn?
Mar cheann-suidhe, bidh mi a’ stiùireadh nan coinneamhan againn, a’ conaltradh leis a’ bhòrd-stiùiridh agus bidh mi a’ cumail sùil air na meadhanan sòisealta againn. A bharrachd air sin, bidh mi a’ dèanamh cinnteach gu bheil sinn ag aithneachadh beachdan no molaidhean nan oileanach eile.
Dè na prìomhachasan a th’ aig Comann nan Oileanach air a’ Bhliadhna Acadaimigeach seo?
- Cleachdadh na Gàidhlig
- Tachartasan – barrachd tachartasan air an làraich agus sa choimhearsnachd
- Leasachadh air na meadhanan sòisealta
Agus beagan spòrs… 60 diog còmhla ri Ceann-suidhe CnO, Eilidh Russell!
- Àm na Nollaige no àm na Bliadhn’ Ùire? – Àm na Nollaige
- Taigh-seinnse no club dannsa? – Taigh-seinnse
- Instagram no TikTok? – TikTok
- Ceòl pop no ceòl na pìoba? – Ceòl na pìoba
- Tì no cofaidh? – Tì
- Cèic no càise? – Cèic
- Spòrs no ceòl? – Ceòl
- Valtos no Niteworks? – Valtos
- Teanta no taigh-òsta? – Teanta
- Agus mu dheireadh, dè am facal Gàidhlig as fheàrr leat? – Dileag