Gàidhlig Ìre 1 – Air-loidhne: 02 an Lùnastal 2022

Gàidhlig Ìre 1 – Air-loidhne

Bidh an cùrsa seo freagarrach do fhìor luchd-tòiseachaidh gun Ghàidhlig sam bith – m.e. daoine aig NACH EIL eòlas ionnsachaidh a-cheana, a leithid Duolingo no clasaichean ionadail*. San ìre seo, gheibhear ionnsachadh air:

• àireamhan ann an structaran eadar-dhealaichte;
• mar a bhios tu a’ bruidhinn ri daoine, agus a’ faighinn a-mach cò às a tha iad;
• mar a bhios tu ag innse is a’ faighneachd mu rudan a tha daoine a’ dèanamh, a leithid am beatha fhèin, obair no cur-seachadan;
• agus mar a bhios tu a’ bruidhinn air sealbh.

Mar phàirt den chùrsa, gheibhear eòlas air gràmar bunaiteach, cothroman sgilean labhairt a chleachdadh is cothrom dòighean ùra cànain is briathrachas ùr ionnsachadh.

*Ma tha eòlas ionnsachaidh Gàidhlig agad mar-thà, math dh’fhaodte gum biodh ìre nas àirde na bu fhreagarraiche dhut.

Airson làn-fhiosrachaidh fhaighinn mu susbaint a’ chùrsa aig an ìre seo, cliog an seo.

Tuairmse Ìre Cùrsa & Co-ionannachd de Ìre SCQF:
An Cùrsa Inntrigidh: Earrann 1 (Aonad 1–3)
SCQF 4 – SQA Ìre Choitcheann Bunaiteach Gàidhlig (Luchd-ionnsachaidh)

Lìbhrigeadh a’ Chùrsa

Lìbhrigear an cùrsa seo thairis air trì làithean (Dimàirt, Diciadain agus Diardaoin), le trì clasaichean ann gach latha:

• Clas 1: 09.30 – 10.45
• Clas 2: 11.15 – 12.30
• Clas 3: 13.30 – 15.00

Thèid na clasaichean a lìbhrigeadh tro Zoom. Far as urrainnear, cha bhi ach ochdnar sa chlas seach 12 mar as àbhaist.