CATHRAICHE ÙR BÒRD STIÙIRIDH SHABHAL MÒR OSTAIG: AONGHAS MACAONGHAIS 

Chaidh Aonghas MacAonghais a thogail le Gàidhlig san teaghlach ann an Uibhist a Tuath, far an deach e an toiseach dhan sgoil san sgìre agus gu Sgoil MhicNeacail, mus deach e an uair sin dhan College of Building and Printing ann an Glaschu. Tha e air a bhith an sàs le gnìomhachas an togail airson còrr is 30 bliadhna, is e ag obair na Stiùiriche thar na 20 bliadhna mu dheireadh. Tha ùidh mhòr aig Aonghas ann an spòrs, gu sònraichte ann an iomain, agus tha e na urrasair is Ceann-suidhe air sgioba Glaschu Meadhan Earra-Ghàidheal agus na Iar-Cheann-suidhe air Comann Ceilteach Ghlaschu. 

Thuirt Aonghas: 

“’S e urram mòr a th’ ann dhòmhsa a bhith nam Chathraiche air Bòrd Stiùiridh an t-Sabhail Mhòir, àite a tha cho prìseil airson cànan is cultar na Gàidhlig, agus airson Alba air fad.  

“Tha ar cothroman ionnsachaidh aig sàr-àrd-ìre a’ cur ri soirbheas an ath ghinealaich de luchd-labhairt na Gàidhlig, agus ri soirbheachas a’ chànain. 

“’S e àm cudromach a tha seo dhan Ghàidhlig agus dhan t-Sabhal, le reachdas ùr ri thighinn ann am Bile nan Cànan Albannach a bharrachd air dùbhlain eile mu choinneamh cholaistean is oilthighean air feadh na dùthcha aig àm dùbhlanach a thaobh an eaconamaidh.

“Bu mhath leam taing mhòr a thoirt dhaibhsan a thàinig romham – Aideen Ní Mháille agus Aonghas S. MacLeòid – a tha, anns na seachd bliadhna a tha mise air a bhith air a’ Bhòrd, air comhairle ghlic is fheumail a thoirt seachad.”