An Cùrsa Inntrigidh
DUAIS: Cùrsaichean air Astar,Teisteanas Shabhal Mòr OstaigDÒIGHEAN IONNSACHAIDH: Air Astar,Pàirt-ùine
DÈ CHO FADA: 10 mìosan no 18 mìosan
CÒD: N/A
NEACH-STIÙIRIDH: An Dr Sìleas L. NicLeòid
CUIR FIOS: Sgioba Chùrsaichean air Astar ( )
SUSBAINT
Ionnsachadh agus clasaichean taice
Tha goireasan a’ chùrsa ri fhaotainn air-loidhne agus nam measg tha leabhraichean-obrach, faidhlichean-fuaime (no CDan) agus leabhraichean teagaisg a tha nam pàirtean de chùrsa a chaidh a dhealbhadh gu faiceallach. Bidh thu a’ dèanamh a’ mhòr-chuid den ionnsachadh san ùine agad fhèin, ro chlas air-loidhne a thèid a chumail gach seachdain le oileanaich eile air a’ chùrsa agus oide. Tha na seiseanan air-loidhne nam pàirtean cudromach den chùrsa, a’ toirt cothrom do dh’oileanaich na thathar air ionnsachadh a chleachdadh agus iad air an stiùireadh le oidean a tha eòlach agus barantaichte. Mairidh gach clas mu uair a thìde. Faodar eisimpleir de dh’eacarsaich bhon chùrsa a leughadh an seo agus cuideachd èisteachd ri eisimpleir de dh’eacarsaich gu h-ìosal.
Teisteanas crìochnachaidh
Gus teisteanas crìochnachaidh Shabhal Mòr Ostaig fhaighinn, feumaidh oileanaich a bhith soirbheachail leis na measaidhean aca anns gach pàirt den chùrsa, agus feumaidh iad co-dhiù 60% de na seiseanan air-loidhne a fhrithealadh.
Measaidhean
Tha measaidhean mar phàirt chudromach den ionnsachadh agus gheibhear iad aig deireadh gach earrann den chùrsa. Airson barrachd fios, thoir sùil air Leabhar-làimhe nan Oileanach. Nuair a tha iad air crìoch shoirbheachail a chur air a’ chùrsa, faodaidh oileanaich àite fhaighinn air CertHE An Cùrsa Comais air neo CertHE An Cùrsa Adhartais (an dèidh agallaimh-fòn).
Ionnsachadh a bharrachd
Clasaichean còmhraidh – Sibh fhèin a-nis!
Tha sinn a’ tabhann chothroman a bharrachd do dh’oileanaich an cuid sgilean labhairt a chleachdadh tro sheiseanan Sibh fhèin a-nis! còmhla ri oide bhon Chùrsa Inntrigidh. ‘S urrainn do dh’oileanaich air Earrannan 2 agus 3 clàradh airson bloc de 16 sheiseanan, fear gach seachdain a tha an Earrann ud a’ ruith (Bann Coitcheann).
Bidh barrachd fios do dh’oileanaich air a’ Bhann Luath ri fhaighinn a dh’aithghearr.
Bidh na seiseanan air-loidhne seo 45 mionaidean, le suas ri 5 oileanach anns gach buidheann.
Chan eil ullachadh sam bith a bharrachd air dhìth airson nan seiseanan seo; ‘s e th’ annta ach cothrom neo-fhoirmeil còmhradh le oileanaich eile bhon Chùrsa Inntrigidh a th’ aig an aon ìre riut fhèin agus le oide ann airson taic is stiùireadh a thoirt dhuibh ma dh’fheumas.
Seiseanan ‘A bheil cuimhne agad?’ (ABC)
Seiseanan gràmair is còmhraidh do dh’oileanaich a tha deiseil leis a’ Chùrsa Inntrigidh.
Airson fiosrachadh a bharrachd agus tiocaidean bruth an seo.
Goireasan eile
Tha stuthan ionnsachaidh a bharrachd a chaidh a dhealbhadh airson taic a chur ris a’ chùrsa ri fhaotainn. ‘S urrainn do dh’oileanaich conaltradh a chumail ri oileanaich eile cuideachd le bhith a’ cleachdadh a’ bhùird-chòmhraidh.
Cìsean is maoineachadh
Airson fios mu chìsean a’ chùrsa, faic an duilleag Cìsean againn.
Taic mhaoineachaidh
Ma tha oileanach den bheachd gum bi duilgheadas aca ri linn pàigheadh cìsean a’ chùrsa, bu chòir fios a leigeil do sgioba rianachd na Colaiste. Tha Sabhal Mòr Ostaig daonnan deònach feuchainn ri fuasgladh a rèiteachadh.
A’ cur a-steach foirm ùidh
Cliog an seo gus foirm ùidh a chur thugainn.
Faodar ceistean sam bith a chur don Sgioba Chùrsaichean air Astar air 01471 888 449, air neo cuir am foirm gu h-àrd thugainn.
Bidh an ath Earrann 1 a’ tòiseachadh san Fhaoilleach 2025.
Clàran-ama
Chithear an seo mar a tha gach earrann a’ ruith gach bliadhna:
An Cùrsa Inntrigidh: Clàr Lìbhrigidh
Clàran-ama a’ Bhann Luath
Bann Luath E1, E2, E3: An Lùnastal 2024–An t-Ògmhios 2025
Clàran-ama a’ Bhann Choitchinn
Bann Coitcheann E1 agus 2 An t-Sultain 2024- An t-Ogmhios 2025
Bann Coitcheann Earrann 2 agus 3, An t-Sultain 2024 – An t-Ògmhios 2025
Bann Coitcheann E3 Sultain 2024- Faoilleach 2025
Bann Coitcheann E1 Faoilleach – Ogmhios 2025
Uairean nan clasaichean
Gheibhear roghainn uairean nan clasaichean ron t-Seachdain Inntrigidh, agus thèid gach uair clas a dhearbhadh san t-Seachdain Inntrigidh. Bidh caochladh uairean eadar Diluain is Dihaoine ri fhaotainn, agus cumaidh oileanaich an aon uair teagaisg airson gach pàirt den chùrsa.
Feumlachdan
Feumaidh cothrom air coimpiutair agus ‘s dòcha fòn a bhith aig gach oileanach. Faic Riatanasan Coimpiutaireachd airson barrachd fios.
Ullachadh agus Inntrigeadh don Chùrsa
Bidh Seachdain Inntrigidh air-loidhne ann cola-deug ro thoiseach a’ chùrsa airson oileanaich a tha clàraichte, gus an dèan iad cinnteach gu bheil eòlas aca air a’ chùrsa gu practaigeach is gu teicnigeach, agus airson eòlas fhaighinn air na h-oileanaich eile.
Bidh Seachdain Ullachaidh ann an uair sin seachdain ro thoiseach a’ chùrsa, ach am faigh na h-oileanaich an cothrom seisean air-loidhne a dhèanamh aig an uair àbhaisteach còmhla ris na h-oileanaich eile is an neach-oide, agus gus an obair-chùrsa a chur air chois.
Cinn-latha nan saor-làithean
Bidh Sabhal Mòr Ostaig dùinte aig àm na Nollaig is na Bliadhn’ Ùire. A bharrachd air sin, bidh saor-làithean samhraidh ann do dh’oileanaich air astar, agus seachdain san Dàmhair is seachdain aig àm na Càisge. Cha bhi saor-làithean ionaidail no nàiseanta sam bith eile air a’ chlàr-ama.
Cinn-latha mu dheireadh airson clàradh
Tha cinn-latha mu dheireadh ann ach am faigh luchd-obrach an t-Sabhail cothrom crìoch a chur air clàradh, àireamhan oileanach a dhearbhadh agus uairean teagaisg a rèiteachadh airson nan Seachdainean Ullachaidh is Inntrigidh.
FOIRM ÙIDH
Cliog an seo gus foirm ùidh a chur thugainn airson a’ Chùrsa Inntrigidh.
SGOIL SHAMHRAIDH ACI (An t-Ògmhios/An t-Iuchar)
Thèid Sgoil Shamhraidh ghoirid a chumail aig Sabhal Mòr Ostaig airson oileanach a th’ air A’ Chùrsa Inntrigidh sa bhliadhna sin fhèin anns an Ògmhios no san Iuchar (ma tha iarrtas ann air a son). Faodaidh oileanaich àite a ghlèidheadh airson 2.5 latha de chlasaichean san t-seachdain sin (an dara cuid Diluain gu Diciadain no Diciadain gu Dihaoine). Thèid clasaichean a thabhann airson oileanach aig gach Earrainn den chùrsa (Earrann 1, Earrann 2, Earrann 3).
Gheibh oileanaich fiosrachadh nas mionaidiche mun Sgoil Shamhraidh anns a’ Ghearran gach bliadhna (cinn-là, cosgaisean (Sgoil Shamhraidh fhèin, àite-fuirich, biadh), clàr-ama).
Tha an Sgoil Shamhraidh roghainneil, ach bheir i cothrom sgoinneil do dh’oileanaich na dh’ionnsaich iad air a’ chùrsa a neartachadh agus a chur an gnìomh, ann an àrainneachd Ghàidhlig còmhla ri oileanaich eile aig an aon ìre.
Mar as trice, gheibhear àite-fuirich aig Sabhal Mòr Ostaig.
‘DÈ DO NAIDHEACHD?’
Gu h-ìosal gheibhear cuairt-litrichean bho na h-oileanaich againn air a’ Chùrsa Inntrigidh:
