CÙRSAICHEAN CÀNAIN
A bheil ùidh agad ann a bhith ag ionnsachadh na Gàidhlig, litreachas na Gàidhlig, foghlam, leasachadh, eachdraidh, dualchas, ceòl, ealain no cultar? Tha Sabhal Mòr Ostaig a’ tabhann chothroman air an àrainn agus air astar aig gach ìre: bho chùrsaichean Gàidhlig do luchd-tòiseachaidh gu cùrsaichean airson fileantaich.
Gheibhear tuilleadh fiosrachaidh mu na cùrsaichean seo gu h-ìosal, ach na bi diùid fios a chur thugainn ma tha ceist sam bith agad:
CÙRSAICHEAN GOIRID – AIR-ASTAR AGUS AIR AN LÀRAICH
Ma tha thu a’ lorg oideachadh aghaidh-ri-aghaidh air an àrainn no air-loidhne, bidh Cùrsaichean Goirid Sabhal Mòr Ostaig gan cumail gach bliadhna thar saor-làithean na Càisge agus an t-samhraidh agus cuideachd tro mhìosan a’ gheamhraidh air-loidhne, le cùrsaichean do gach comas cànain bho Ìre 1 gu Ìre 10, a bharrachd air taghadh de chùrsaichean ann an ceòl, na h-ealain, eachdraidh agus cultar.
A bheil thu airson Gàidhlig ionnsachadh gu luath? No am bu toigh leat gabhail air do shocair? Tha SpeakGaelic a’ tabhann rudeigin airson a h-uile duine. ‘S urrainn dhut ionnsachadh sa chlas, tro phrògraman TBh, pod-chraolaidhean no aig an astar agad fhèin air-loidhne.
LUCHD-TÒISEACHAIDH & EADAR-MHEADHANACH – AIR ASTAR
Ma tha thu ùr don Ghàidhlig agus a’ coimhead airson rudeigin le structar pàirt-ùine, tha sinn a’ moladh An Cùrsa Inntrigidh, a tha na chùrsa air astar le taic airson luchd-tòiseachaidh agus luchd-ionnsachaidh le beagan Gàidhlig.
Ma tha deagh eòlas agad air a’ chànan mar-thà, bidh sinn a’ tabhann chùrsaichean air astar leithid CertHE An Cùrsa Adhartais, a bheir luchd-ionnsachaidh gu Bliadhna 2 de chùrsaichean fo-cheum aig Sabhal Mòr Ostaig.
LUCHD EADAR-MHEADHANACH & FILEANTA – AIR AN ÀRAINN
Dhuibhse a tha airson Gàidhlig ionnsachadh air an àrainn, ’s e cùrsa bogaidh aon-bhliadhna, chom-pàirteachail agus eadar-ghnìomhach a th’ ann an CertHE An Cùrsa Comais. Coltach ris a’ Chùrsa Adhartais, bheir an duais aig deireadh na bliadhna cothrom dhut faighinn a-steach don dàrna bliadhna de na cùrsaichean fo-cheum againn.
Mas e neach-labhairt fileanta Gàidhlig a th’ annad a tha airson Gàidhlig ionnsachadh gu ìre phroifeiseanta ann an àrainneachd làn Ghàidhlig, tha sinn a’ moladh a’ chùrsa aon-bhliadhna againn, CertHE Gàidhlig is Conaltradh.
